ಅಫ್ಘಾನಿಸ್ತಾನ : ಅಫ್ಘಾನಿಸ್ತಾನದ ಧಾರ್ಮಿಕ ಅಧಿಕಾರಿಗಳು ಶವ್ವಾಲ್ ತಿಂಗಳ ಚಂದ್ರನ ದರ್ಶನವನ್ನು ದೃಢಪಡಿಸಿದ್ದು, ಅದರಂತೆ ಇಂದು (ಮಾರ್ಚ್ 19, 2026) ದೇಶಾದ್ಯಂತ ಈದ್-ಉಲ್-ಫಿತರ್ ಆಚರಿಸಲಾಗುತ್ತಿದೆ. ಈ ಮೂಲಕ 2026ರಲ್ಲಿ ಈದ್ ಆಚರಿಸುತ್ತಿರುವ ಮೊದಲ ಮುಸ್ಲಿಂ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಅಫ್ಘಾನಿಸ್ತಾನ ಪಾತ್ರವಾಗಿದೆ. ಮುಂಜಾನೆ ಮಸೀದಿಗಳಲ್ಲಿ ವಿಶೇಷ ಈದ್ ಪ್ರಾರ್ಥನೆಗಳು ನಡೆದಿದ್ದು, ಜನರು ಪರಸ್ಪರ ಶುಭಾಶಯ ವಿನಿಮಯ ಮಾಡಿಕೊಳ್ಳುತ್ತಿದ್ದಾರೆ.
ಯುದ್ಧದ ಮಧ್ಯೆ ತಾತ್ಕಾಲಿಕ ಕದನ ವಿರಾಮ: ಅಫ್ಘಾನಿಸ್ತಾನ ಮತ್ತು ಪಾಕಿಸ್ತಾನ ನಡುವಿನ ಗಡಿ ಸಂಘರ್ಷ ತಾರಕಕ್ಕೇರಿರುವ ಈ ಸಮಯದಲ್ಲಿ, ಈದ್ ಹಬ್ಬದ ಪ್ರಯುಕ್ತ ಉಭಯ ದೇಶಗಳು ತಾತ್ಕಾಲಿಕ ಕದನ ವಿರಾಮಕ್ಕೆ (Pause in hostilities) ಒಪ್ಪಿಕೊಂಡಿವೆ. ಸೌದಿ ಅರೇಬಿಯಾ, ಕತಾರ್ ಮತ್ತು ಟರ್ಕಿ ದೇಶಗಳ ಮನವಿಯ ಮೇರೆಗೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿದ್ದು, ಮಾರ್ಚ್ 19 ರಿಂದ ಮಾರ್ಚ್ 23 ರವರೆಗೆ ಐದು ದಿನಗಳ ಕಾಲ ಯುದ್ಧ ವಿರಾಮ ಘೋಷಿಸಲಾಗಿದೆ. ಇದು ಹಬ್ಬದ ಸಮಯದಲ್ಲಿ ಜನರಿಗೆ ಸ್ವಲ್ಪ ನಿರಾಳತೆ ತಂದಿದೆ.
ಇತರ ದೇಶಗಳಲ್ಲಿ ಈದ್ ಯಾವಾಗ? ಅಫ್ಘಾನಿಸ್ತಾನ ಇಂದು ಈದ್ ಆಚರಿಸುತ್ತಿದ್ದರೆ, ಸೌದಿ ಅರೇಬಿಯಾ, ಯುಎಇ, ಕತಾರ್, ಕುವೈತ್ ಮತ್ತು ಟರ್ಕಿ ದೇಶಗಳಲ್ಲಿ ಚಂದ್ರ ದರ್ಶನವಾಗದ ಕಾರಣ ಆ ದೇಶಗಳಲ್ಲಿ ನಾಳೆ (ಮಾರ್ಚ್ 20, ಶುಕ್ರವಾರ) ಈದ್ ಆಚರಿಸಲು ನಿರ್ಧರಿಸಲಾಗಿದೆ. ಇನ್ನು ಭಾರತ, ಪಾಕಿಸ್ತಾನ ಮತ್ತು ಬಾಂಗ್ಲಾದೇಶಗಳಲ್ಲಿ ಇಂದು ಸಂಜೆ ಚಂದ್ರ ದರ್ಶನವಾದರೆ ನಾಳೆ ಅಥವಾ ಹವಾಮಾನ ವೈಪರೀತ್ಯವಿದ್ದರೆ ಮಾರ್ಚ್ 21 ರಂದು ಈದ್ ಆಚರಿಸುವ ಸಾಧ್ಯತೆಯಿದೆ.
