ಇಸ್ಲಾಮಾಬಾದ್ : ಪಾಕಿಸ್ತಾನ ಮತ್ತು ಅಮೆರಿಕಾ ನಡುವಿನ ರಾಜತಾಂತ್ರಿಕ ಸಂಬಂಧದಲ್ಲಿ ‘ಕ್ರಿಪ್ಟೋ ಡಿಪ್ಲೊಮಸಿ’ (Crypto Diplomacy) ಅಥವಾ ಬಿಟ್ ಕಾಯಿನ್ ಆಧಾರಿತ ರಾಜತಾಂತ್ರಿಕತೆ ಹೊಸ ಸಂಚಲನ ಮೂಡಿಸಿದೆ. 35 ವರ್ಷದ ಬಿಲಾಲ್ ಬಿನ್ ಸಾಕಿಬ್ ಎಂಬ ಕ್ರಿಪ್ಟೋ ಉದ್ಯಮಿ ಪಾಕಿಸ್ತಾನ ಸರ್ಕಾರ ಮತ್ತು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನಡುವೆ ಪ್ರಬಲ ಸೇತುವೆಯಾಗಿ ಹೊರಹೊಮ್ಮಿದ್ದಾರೆ. ಒಂದು ಕಾಲದಲ್ಲಿ ಬ್ರಿಟನ್ನಲ್ಲಿ ಶೌಚಾಲಯ ಸ್ವಚ್ಛಗೊಳಿಸುವ ಕೆಲಸ ಮಾಡುತ್ತಿದ್ದ ಬಿಲಾಲ್, ಇಂದು ಪಾಕಿಸ್ತಾನದ ಅತ್ಯಂತ ಪ್ರಭಾವಶಾಲಿ ವ್ಯಕ್ತಿಗಳಲ್ಲಿ ಒಬ್ಬರಾಗಿ ಟ್ರಂಪ್ ಅವರ ಆಪ್ತ ವಲಯದೊಂದಿಗೆ ಕೈಜೋಡಿಸಿರುವುದು ಜಗತ್ತನ್ನೇ ಬೆಚ್ಚಿಬೀಳಿಸಿದೆ.
ಈ ರಾಜತಾಂತ್ರಿಕ ಸಂಬಂಧದ ಕೇಂದ್ರಬಿಂದು ಟ್ರಂಪ್ ಅವರ ಪುತ್ರರು ಸಹ-ಸ್ಥಾಪಿಸಿರುವ ‘ವರ್ಲ್ಡ್ ಲಿಬರ್ಟಿ ಫೈನಾನ್ಷಿಯಲ್’ (WLF) ಎಂಬ ಕ್ರಿಪ್ಟೋ ಪ್ಲಾಟ್ಫಾರ್ಮ್ ಆಗಿದೆ. ಈ ಕಂಪನಿಯೊಂದಿಗೆ ಪಾಕಿಸ್ತಾನ ಸರ್ಕಾರವು ಪ್ರಮುಖ ಒಪ್ಪಂದಗಳನ್ನು ಮಾಡಿಕೊಂಡಿದ್ದು, ಇಸ್ಲಾಮಾಬಾದ್ನಲ್ಲಿ ನಡೆದ ಈ ಕಾರ್ಯಕ್ರಮಕ್ಕೆ ಟ್ರಂಪ್ ಅವರ ಆಪ್ತ ಸ್ಟೀವ್ ವಿಟ್ಕಾಫ್ ಅವರ ಪುತ್ರ ಝಕಾರಿ ವಿಟ್ಕಾಫ್ ಅತಿಥಿಯಾಗಿ ಆಗಮಿಸಿದ್ದರು. ಈ ‘ಕ್ರಿಪ್ಟೋ ನಂಟು’ ಕೇವಲ ತಂತ್ರಜ್ಞಾನಕ್ಕೆ ಸೀಮಿತವಾಗದೆ, ಅಮೆರಿಕಾ ಮತ್ತು ಪಾಕಿಸ್ತಾನದ ನಡುವಿನ ವರ್ಷಗಳ ಕಾಲದ ರಾಜತಾಂತ್ರಿಕ ಬಿಕ್ಕಟ್ಟನ್ನು ಶಮನಗೊಳಿಸುವಲ್ಲಿ ಯಶಸ್ವಿಯಾಗಿದೆ.
ಈ ಹೊಸ ರಣತಂತ್ರದಿಂದಾಗಿ ಪಾಕಿಸ್ತಾನಕ್ಕೆ ಅಮೆರಿಕಾದಲ್ಲಿ ಭಾರಿ ಲಾಭಗಳು ದೊರೆತಿವೆ. ಪಾಕಿಸ್ತಾನದ ಸರಕುಗಳ ಮೇಲೆ ಅಮೆರಿಕಾ ವಿಧಿಸುತ್ತಿದ್ದ ವ್ಯಾಪಾರ ಸುಂಕವನ್ನು ಶೇಕಡಾ 19ಕ್ಕೆ ಇಳಿಸಲಾಗಿದೆ, ಇದು ಭಾರತದಂತಹ ರಾಷ್ಟ್ರಗಳ ಮೇಲಿನ ಸುಂಕಕ್ಕಿಂತಲೂ ಕಡಿಮೆಯಾಗಿದೆ. ಇದಲ್ಲದೆ, ಇರಾನ್ ಮತ್ತು ಅಮೆರಿಕಾ ನಡುವಿನ ಭೀಕರ ಯುದ್ಧದ ಸನ್ನಿವೇಶದಲ್ಲಿ ಪಾಕಿಸ್ತಾನವು ಪ್ರಮುಖ ಸಂಧಾನಕಾರನಾಗಿ ಹೊರಹೊಮ್ಮಿದೆ. ಟ್ರಂಪ್ ಅವರು ಪಾಕಿಸ್ತಾನದ ಮಿಲಿಟರಿ ಮುಖ್ಯಸ್ಥ ಅಸಿಮ್ ಮುನೀರ್ ಅವರನ್ನು “ಗ್ರೇಟ್ ಜನರಲ್” ಎಂದು ಶ್ಲಾಘಿಸುವ ಮಟ್ಟಕ್ಕೆ ಈ ಸಂಬಂಧ ವೃದ್ಧಿಯಾಗಿದೆ.
ಬಿಲಾಲ್ ಬಿನ್ ಸಾಕಿಬ್ ಅವರ ಈ ಯಶಸ್ವಿ ಪ್ರಯೋಗವು ಪಾಕಿಸ್ತಾನದ ಆರ್ಥಿಕತೆಯನ್ನು ಡಿಜಿಟಲೀಕರಣಗೊಳಿಸುವ ಗುರಿ ಹೊಂದಿದೆ. ಪಾಕಿಸ್ತಾನದ ಅತಿದೊಡ್ಡ ‘ಅನ್ಬ್ಯಾಂಕ್ಡ್’ ಜನಸಂಖ್ಯೆಗೆ ಡಿಜಿಟಲ್ ವ್ಯಾಲೆಟ್ ಒದಗಿಸುವುದು ಮತ್ತು ಅಲ್ಲಿನ ಅಪರೂಪದ ಖನಿಜಗಳನ್ನು ಕ್ರಿಪ್ಟೋ ಮೂಲಕ ಟೋಕನೈಸ್ ಮಾಡುವುದು ಇವರ ಮುಂದಿನ ಯೋಜನೆಯಾಗಿದೆ. ಸಾಲದ ಸುಳಿಯಲ್ಲಿ ಸಿಲುಕಿರುವ ಪಾಕಿಸ್ತಾನಕ್ಕೆ ಈ ಕ್ರಿಪ್ಟೋ ನಂಟು ಹೊಸ ಆಶಾದಾಯಕ ಹಾದಿಯಾಗಿದೆ. ಆದರೂ, ಅಂತರಾಷ್ಟ್ರೀಯ ಹಣಕಾಸು ನಿಧಿ (IMF) ಇಂತಹ ಕ್ರಿಪ್ಟೋ ಪ್ರಯೋಗಗಳಿಗೆ ಆಕ್ಷೇಪ ವ್ಯಕ್ತಪಡಿಸುವ ಸಾಧ್ಯತೆಯಿದ್ದು, ಈ ಹಾದಿ ಸವಾಲಿನಿಂದ ಕೂಡಿದೆ ಎಂದು ವಿಶ್ಲೇಷಿಸಲಾಗಿದೆ.
