ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಭೀಕರ ಯುದ್ಧವು ಕೇವಲ ರಾಜಕೀಯಕ್ಕೆ ಸೀಮಿತವಾಗದೆ, ಈಗ ಕ್ರೀಡಾಂಗಣದವರೆಗೂ ಬಂದು ತಲುಪಿದೆ. ಯುದ್ಧದ 10ನೇ ದಿನಕ್ಕೆ ಕಾಲಿಟ್ಟಿರುವ ಈ ಸಂಘರ್ಷದಿಂದಾಗಿ 2026ರ ಫಿಫಾ ವಿಶ್ವಕಪ್ (FIFA World Cup) ಮೇಲೆ ಕರಾಳ ಛಾಯೆ ಆವರಿಸಿದೆ. ಇರಾಕ್ ಫುಟ್ಬಾಲ್ ತಂಡದ ಆಟಗಾರರು ಯುದ್ಧದ ಕಾರಣದಿಂದಾಗಿ ತಮ್ಮ ದೇಶದಲ್ಲೇ ಲಾಕ್ ಆಗಿದ್ದು, ಅವರ ವಿಶ್ವಕಪ್ ಕನಸು ಭಗ್ನಗೊಳ್ಳುವ ಆತಂಕ ಎದುರಾಗಿದೆ. 40 ವರ್ಷಗಳ ನಂತರ ವಿಶ್ವಕಪ್ಗೆ ಅರ್ಹತೆ ಪಡೆಯುವ ಸನಿಹದಲ್ಲಿರುವ ಇರಾಕ್ ತಂಡದ ಭವಿಷ್ಯ ಈಗ ಫಿಫಾ ತೆಗೆದುಕೊಳ್ಳುವ ಒಂದು ನಿರ್ಧಾರದ ಮೇಲೆ ನಿಂತಿದೆ.
ಸಮಸ್ಯೆ ಏನು? ಇರಾಕ್ ದೇಶದ ಫುಟ್ಬಾಲ್ ತಂಡವು 2026ರ ವಿಶ್ವಕಪ್ ಆಡಲು ಒಂದು ಪ್ರಮುಖ ಪಂದ್ಯವನ್ನು (ಪ್ಲೇ-ಆಫ್) ಆಡಬೇಕಿದೆ. ಈ ಪಂದ್ಯ ಮಾರ್ಚ್ 31ಕ್ಕೆ ಮೆಕ್ಸಿಕೋದಲ್ಲಿ ನಡೆಯಬೇಕಿದೆ. ಆದರೆ ಇರಾನ್ ಮತ್ತು ಅಮೆರಿಕ ನಡುವಿನ ಯುದ್ಧದಿಂದಾಗಿ ಇರಾಕ್ನ ಎಲ್ಲಾ ವಿಮಾನ ನಿಲ್ದಾಣಗಳನ್ನು ಬಂದ್ ಮಾಡಲಾಗಿದೆ.
ಆಟಗಾರರಿಗೆ ಬಂದಿರುವ ತೊಂದರೆಗಳೇನು?
- ಪ್ರಯಾಣಕ್ಕೆ ಅಡ್ಡಿ: ವಿಮಾನ ನಿಲ್ದಾಣಗಳು ಬಂದ್ ಆಗಿರುವುದರಿಂದ ಆಟಗಾರರು ತಮ್ಮ ದೇಶದಿಂದ ಹೊರಹೋಗಲು ಸಾಧ್ಯವಾಗುತ್ತಿಲ್ಲ.
- ವೀಸಾ ಸಿಗುತ್ತಿಲ್ಲ: ಯುದ್ಧದ ಭಯದಿಂದ ವಿದೇಶಿ ರಾಯಭಾರ ಕಚೇರಿಗಳು ಮುಚ್ಚಿವೆ, ಹೀಗಾಗಿ ಆಟಗಾರರಿಗೆ ಪಂದ್ಯಕ್ಕೆ ಬೇಕಾದ ವೀಸಾ ಪಡೆಯಲು ಸಾಧ್ಯವಾಗುತ್ತಿಲ್ಲ.
- ಕೋಚ್ ಎಲ್ಲಿದ್ದಾರೆ?: ತಂಡದ ತರಬೇತುದಾರ (ಕೋಚ್) ಗ್ರಹಾಂ ಅರ್ನಾಲ್ಡ್ ಅವರು ಕೂಡ ಯುದ್ಧದ ಕಾರಣದಿಂದಾಗಿ ದುಬೈನಲ್ಲಿ ಸಿಲುಕಿಕೊಂಡಿದ್ದಾರೆ.
ಇರಾಕ್ ಕೋಚ್ ಫಿಫಾ (FIFA) ಗೆ ಕೇಳಿದ್ದೇನು? “ನಮ್ಮ ತಂಡದ ಅತ್ಯುತ್ತಮ ಆಟಗಾರರು ಯುದ್ಧದಿಂದಾಗಿ ದೇಶ ಬಿಟ್ಟು ಬರಲು ಆಗುತ್ತಿಲ್ಲ. ಸರಿಯಾದ ತಯಾರಿ ಇಲ್ಲದೆ ನಾವು ಈ ಮುಖ್ಯ ಪಂದ್ಯವನ್ನು ಆಡಲು ಸಾಧ್ಯವಿಲ್ಲ. ದಯವಿಟ್ಟು ಈ ಪಂದ್ಯವನ್ನು ಸ್ವಲ್ಪ ದಿನಗಳ ಕಾಲ ಮುಂದೂಡಿ (Delay)” ಎಂದು ಫಿಫಾ ಸಂಸ್ಥೆಗೆ ಇರಾಕ್ ಕೋಚ್ ಮನವಿ ಮಾಡಿದ್ದಾರೆ.
ಇರಾನ್ ತಂಡದ ಕಥೆಯೇನು? ಇರಾನ್ ದೇಶ ಈಗಾಗಲೇ ವಿಶ್ವಕಪ್ಗೆ ಆಯ್ಕೆಯಾಗಿದೆ. ಆದರೆ ಅಮೆರಿಕವು ಇರಾನ್ ಮೇಲೆ ದಾಳಿ ಮಾಡುತ್ತಿರುವುದರಿಂದ, ಅಮೆರಿಕದಲ್ಲಿ ನಡೆಯುವ ವಿಶ್ವಕಪ್ನಲ್ಲಿ ಇರಾನ್ ತಂಡ ಭಾಗವಹಿಸುವುದು ಅನುಮಾನವಾಗಿದೆ. ಒಂದು ವೇಳೆ ಇರಾನ್ ಹಿಂದೆ ಸರಿದರೆ ಇರಾಕ್ ತಂಡಕ್ಕೆ ಅದೃಷ್ಟ ಒಲಿಯಬಹುದು.
