Harish Rana (ಹಿನ್ನೆಲೆ ಮತ್ತು ಸುಪ್ರೀಂ ಕೋರ್ಟ್ ತೀರ್ಪು): 32 ವರ್ಷದ ಹರೀಶ್ ರಾಣಾ 2013 ರಲ್ಲಿ ಪಂಜಾಬ್ ವಿಶ್ವವಿದ್ಯಾಲಯದಲ್ಲಿ ಓದುತ್ತಿದ್ದಾಗ ನಾಲ್ಕನೇ ಮಹಡಿಯಿಂದ ಬಿದ್ದು ಮೆದುಳಿಗೆ ತೀವ್ರ ಪೆಟ್ಟು ಮಾಡಿಕೊಂಡಿದ್ದರು. ಅಂದಿನಿಂದ ಅವರು ಹಾಸಿಗೆ ಹಿಡಿದಿದ್ದು, ಕೃತಕ ಉಸಿರಾಟ ಮತ್ತು ಆಹಾರದ ನಳಿಕೆಯ ಸಹಾಯದಿಂದ ಬದುಕುತ್ತಿದ್ದರು. ಮಗನ ನೋವನ್ನು ನೋಡಲಾಗದೆ ತಂದೆ ಅಶೋಕ್ ರಾಣಾ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದರು. ಸುಪ್ರೀಂ ಕೋರ್ಟ್ನ ನ್ಯಾಯಮೂರ್ತಿಗಳಾದ ಜೆ.ಬಿ. ಪಾರ್ದಿವಾಲಾ ಮತ್ತು ಕೆ.ವಿ. ವಿಶ್ವನಾಥನ್ ಅವರ ಪೀಠವು, ಕೃತಕವಾಗಿ ಬದುಕನ್ನು ವಿಸ್ತರಿಸುವ ಬದಲು ಘನತೆಯಿಂದ ಸಾವನ್ನಪ್ಪಲು ಅವಕಾಶ ನೀಡುವುದು ಮಾನವೀಯತೆ ಎಂದು ಅಭಿಪ್ರಾಯಪಟ್ಟು ಮೊದಲ ಬಾರಿಗೆ ಇಂತಹ ತೀರ್ಪು ನೀಡಿದೆ.
ಕಣ್ಣೀರು ತರಿಸುವ ವಿದಾಯ: ಹರೀಶ್ ಅವರನ್ನು ದೆಹಲಿಯ ಏಮ್ಸ್ (AIIMS) ಆಸ್ಪತ್ರೆಗೆ ಸ್ಥಳಾಂತರಿಸುವ ಮೊದಲು ಕುಟುಂಬಸ್ಥರು ಭಾವನಾತ್ಮಕವಾಗಿ ವಿದಾಯ ಹೇಳಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ 22 ಸೆಕೆಂಡ್ಗಳ ವಿಡಿಯೋದಲ್ಲಿ, ಬ್ರಹ್ಮಕುಮಾರಿ ಸಹೋದರಿಯೊಬ್ಬರು ಹರೀಶ್ ಹಣೆ ಮೇಲೆ ತಿಲಕವನ್ನಿಟ್ಟು, “ಎಲ್ಲರನ್ನೂ ಕ್ಷಮಿಸು, ಎಲ್ಲರ ಬಳಿ ಕ್ಷಮೆ ಕೇಳು. ಈಗ ಹೋಗುವ ಸಮಯ ಬಂದಿದೆ, ಹೋಗಿ ಬಾ” ಎಂದು ಹೇಳುತ್ತಿರುವುದು ನೋಡುಗರ ಕಣ್ಣಾಲಿಗಳನ್ನು ಒದ್ದೆ ಮಾಡುವಂತಿದೆ.
ಅರುಣಾ ಶಾನಬಾಗ್ ಹೋರಾಟದ ನೆನಪು: ಭಾರತದಲ್ಲಿ ಕಾರುಣ್ಯ ಮರಣದ ಕುರಿತು ನಡೆದ ದಶಕಗಳ ಹೋರಾಟದ ಫಲವಾಗಿ ಇಂದು ಹರೀಶ್ ರಾಣಾ ಅವರಿಗೆ ಈ ನ್ಯಾಯ ಸಿಕ್ಕಿದೆ. ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ ರಾಣಾ ಕುಟುಂಬದ ಧೈರ್ಯ ಮತ್ತು 13 ವರ್ಷಗಳ ಕಾಲ ಅವರು ಮಾಡಿದ ಸೇವೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದೆ. ಈ ತೀರ್ಪು ಸಾವು ಆರಿಸಿಕೊಳ್ಳುವ ಬಗ್ಗೆ ಅಲ್ಲ, ಬದಲಾಗಿ ಕೃತಕವಾಗಿ ನೋವನ್ನು ವಿಸ್ತರಿಸಬಾರದು ಎಂಬ ಬಗ್ಗೆಯಾಗಿದೆ ಎಂದು ಕೋರ್ಟ್ ತಿಳಿಸಿದೆ.
