ಇರಾನ್ : ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ನಡೆಸುತ್ತಿರುವ ಯುದ್ಧವು ಇಂದು 25ನೇ ದಿನಕ್ಕೆ ಕಾಲಿಟ್ಟಿದ್ದು, ರಣರಂಗದಲ್ಲಿ ಪರಸ್ಪರ ದಾಳಿ ಮತ್ತು ಪ್ರತಿ-ದಾಳಿಗಳು ತೀವ್ರಗೊಂಡಿವೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ಜೊತೆ ಶಾಂತಿ ಮಾತುಕತೆಗಳು ನಡೆಯುತ್ತಿವೆ ಮತ್ತು ಇರಾನ್ ಈ ಬಾರಿ ಒಂದು ದೀರ್ಘಾವಧಿಯ ಒಪ್ಪಂದಕ್ಕೆ ಬರಲು ಸಿದ್ಧವಿದೆ ಎಂದು ಹೇಳಿದ್ದಾರೆ. ಆದರೆ, ಇರಾನ್ ಈ ಹೇಳಿಕೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದು, ಇದನ್ನು ‘ನಕಲಿ ಸುದ್ದಿ’ ಮತ್ತು ಅಮೆರಿಕ ತನ್ನ ಸೇನೆಯನ್ನು ಈ ಭಾಗದಲ್ಲಿ ಸಜ್ಜುಗೊಳಿಸಲು ಕಾಲಾವಕಾಶ ಪಡೆಯಲು ಆಡುತ್ತಿರುವ ನಾಟಕ ಎಂದು ಟೀಕಿಸಿದೆ.
ಯುದ್ಧದ ತೀವ್ರತೆಯ ನಡುವೆಯೇ ಟ್ರಂಪ್ ಅವರು ಇರಾನ್ನ ಪ್ರಮುಖ ವಿದ್ಯುತ್ ಸ್ಥಾವರಗಳು ಮತ್ತು ಇಂಧನ ಮೂಲಸೌಕರ್ಯಗಳ ಮೇಲೆ ನಡೆಸಲು ಉದ್ದೇಶಿಸಿದ್ದ ದಾಳಿಯನ್ನು 5 ದಿನಗಳವರೆಗೆ ಮುಂದೂಡುವಂತೆ ತಮ್ಮ ಮಿಲಿಟರಿಗೆ ಸೂಚನೆ ನೀಡಿದ್ದಾರೆ. ಆದಾಗ್ಯೂ, ಇರಾನ್ ತನ್ನ ಆಕ್ರಮಣಕಾರಿ ಧೋರಣೆಯನ್ನು ಮುಂದುವರಿಸಿದ್ದು, ಇಂದು ಮುಂಜಾನೆ ಇಸ್ರೇಲ್ನ ಉತ್ತರ ಭಾಗದ ಮೇಲೆ ಕ್ಷಿಪಣಿಗಳ ಸುರಿಮಳೆಗೈದಿದೆ. ಇಸ್ರೇಲ್ನ ‘ಡೇವಿಡ್ಸ್ ಸ್ಲಿಂಗ್’ ವಾಯು ರಕ್ಷಣಾ ವ್ಯವಸ್ಥೆಯಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದರಿಂದ, ಇರಾನ್ನ ಕೆಲವು ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ದಕ್ಷಿಣ ಇಸ್ರೇಲ್ನಲ್ಲಿ ಸ್ಫೋಟಗೊಂಡಿದ್ದು, ಹತ್ತಾರು ಜನರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
ಲೆಬನಾನ್ ಮತ್ತು ಇರಾಕ್ನಲ್ಲೂ ಸಂಘರ್ಷದ ಕಾವು ಹೆಚ್ಚಾಗಿದ್ದು, ಇಸ್ರೇಲ್ ಸೇನೆಯು ಬೈರೂತ್ನ ಜನವಸತಿ ಪ್ರದೇಶಗಳು ಮತ್ತು ಪೆಟ್ರೋಲ್ ಬಂಕ್ಗಳ ಮೇಲೆ ಭಾರಿ ಬಾಂಬ್ ದಾಳಿ ನಡೆಸಿದೆ. ಸೌದಿ ಅರೇಬಿಯಾ ಮತ್ತು ಕುವೈತ್ನಂತಹ ಗಲ್ಫ್ ರಾಷ್ಟ್ರಗಳು ಇರಾನ್ ಕಡೆಯಿಂದ ಬಂದ ಸುಮಾರು 20 ಡ್ರೋನ್ ಮತ್ತು ಕ್ಷಿಪಣಿಗಳನ್ನು ಯಶಸ್ವಿಯಾಗಿ ಹೊಡೆದುರುಳಿಸಿವೆ. ಈ ಯುದ್ಧದ ಜ್ವಾಲೆ ಈಗ ಇಡೀ ಮಧ್ಯಪ್ರಾಚ್ಯವನ್ನು ಆವರಿಸುತ್ತಿದ್ದು, ಯುಕೆಯಂತಹ ರಾಷ್ಟ್ರಗಳು ಇರಾನ್ ದಾಳಿಯನ್ನು ಎದುರಿಸಲು ಈ ಪ್ರದೇಶಕ್ಕೆ ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆಗಳನ್ನು ರವಾನಿಸುತ್ತಿವೆ.
ಆರ್ಥಿಕವಾಗಿ ಈ ಯುದ್ಧವು ಇಡೀ ವಿಶ್ವಕ್ಕೆ ಮಾರಕವಾಗಿ ಪರಿಣಮಿಸಿದೆ. ಇರಾನ್ ಹಾರ್ಮುಜ್ ಜಲಸಂಧಿಯನ್ನು ಬಂದ್ ಮಾಡಿರುವುದರಿಂದ ಜಾಗತಿಕವಾಗಿ ತೈಲ ಪೂರೈಕೆಯಲ್ಲಿ ಭಾರಿ ವ್ಯತ್ಯಯ ಉಂಟಾಗಿದೆ. ತನ್ನ ತೈಲದ ಶೇಕಡಾ 90 ರಷ್ಟು ಭಾಗಕ್ಕೆ ಈ ಮಾರ್ಗವನ್ನೇ ಅವಲಂಬಿಸಿರುವ ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳಲ್ಲಿ ಇಂಧನಕ್ಕಾಗಿ ಹಾಹಾಕಾರ ಶುರುವಾಗಿದೆ. ಈ ದಿಗ್ಬಂಧನವನ್ನು ‘ಆರ್ಥಿಕ ಭಯೋತ್ಪಾದನೆ’ ಎಂದು ಕರೆದಿರುವ ಸಂಯುಕ್ತ ಅರಬ್ ಸಂಸ್ಥಾನವು (UAE), ತೈಲ ಬೆಲೆ ಗಗನಕ್ಕೇರುತ್ತಿರುವುದು ಪ್ರತಿಯೊಂದು ರಾಷ್ಟ್ರದ ಮೇಲೂ ಗಂಭೀರ ಪರಿಣಾಮ ಬೀರುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದೆ.
