ಅಮೆರಿಕ : ಮಧ್ಯಪ್ರಾಚ್ಯದಲ್ಲಿ ಇರಾನ್ ಮತ್ತು ಇಸ್ರೇಲ್ ನಡುವಿನ ಯುದ್ಧ ಭೀಕರ ಸ್ವರೂಪ ಪಡೆಯುತ್ತಿದ್ದಂತೆ, ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಕಂಪನ ಶುರುವಾಗಿದೆ. ಪೆಟ್ರೋಲ್ ಮತ್ತು ಗ್ಯಾಸ್ ಬೆಲೆಗಳು ಗಗನಕ್ಕೇರುತ್ತಿರುವುದನ್ನು ಕಂಡು ಬೆಚ್ಚಿಬಿದ್ದಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಈಗ ಒಂದು ಐತಿಹಾಸಿಕ ಮತ್ತು ಅಚ್ಚರಿಯ ನಿರ್ಧಾರ ಕೈಗೊಂಡಿದ್ದಾರೆ. ಅಮೆರಿಕದ 100 ವರ್ಷಗಳ ಹಳೆಯ ನೌಕಾಯಾನ ಕಾನೂನು ‘ಜೋನ್ಸ್ ಆಕ್ಟ್’ ಅನ್ನು ಅಮಾನತುಗೊಳಿಸುವ ಮೂಲಕ ಟ್ರಂಪ್ ವಿಶ್ವದ ಗಮನ ಸೆಳೆದಿದ್ದಾರೆ. ಈ ನಿರ್ಧಾರದಿಂದ ಸಾಮಾನ್ಯ ಜನರ ಜೇಬಿಗೆ ಹೇಗೆ ಲಾಭವಾಗಲಿದೆ? ಏನಿದು ಜೋನ್ಸ್ ಆಕ್ಟ್?
ಏನಿದು ಜೋನ್ಸ್ ಆಕ್ಟ್?
1920 ರಲ್ಲಿ ಜಾರಿಗೆ ಬಂದ ಈ ಕಾನೂನಿನ ಪ್ರಕಾರ, ಅಮೆರಿಕದ ಒಂದು ಬಂದರಿನಿಂದ ಮತ್ತೊಂದು ಬಂದರಿಗೆ ಸರಕುಗಳನ್ನು ಸಾಗಿಸುವ ಹಡಗುಗಳು ಅಮೆರಿಕದಲ್ಲೇ ತಯಾರಾಗಿರಬೇಕು, ಅಮೆರಿಕದ ನಾಗರಿಕರ ಮಾಲೀಕತ್ವದಲ್ಲಿರಬೇಕು ಮತ್ತು ಅದರಲ್ಲಿ ಅಮೆರಿಕದ ಸಿಬ್ಬಂದಿಯೇ ಇರಬೇಕು. ಇದು ವಿದೇಶಿ ಹಡಗುಗಳು ಅಮೆರಿಕದ ಒಳನಾಡಿನ ವ್ಯಾಪಾರದಲ್ಲಿ ಭಾಗವಹಿಸುವುದನ್ನು ತಡೆಯುತ್ತದೆ.
ಟ್ರಂಪ್ ಯಾಕೆ ಇದನ್ನು ಅಮಾನತುಗೊಳಿಸಿದ್ದಾರೆ?
ಯುದ್ಧದಿಂದಾಗಿ ಜಾಗತಿಕವಾಗಿ ತೈಲ ಪೂರೈಕೆ ಅಸ್ತವ್ಯಸ್ತಗೊಂಡಿದೆ. ಅಮೆರಿಕದಲ್ಲಿ ಪೆಟ್ರೋಲ್ ಬೆಲೆ ಪ್ರತಿ ಗ್ಯಾಲನ್ಗೆ ಸುಮಾರು $3.84 ಕ್ಕೆ ಏರಿಕೆಯಾಗಿದೆ (ಇದು ಯುದ್ಧಕ್ಕೂ ಮೊದಲಿಗಿಂತ ಶೇ. 25 ರಷ್ಟು ಹೆಚ್ಚು). ದೇಶದ ಒಳಗೆ ತೈಲ, ನೈಸರ್ಗಿಕ ಅನಿಲ, ಕಲ್ಲಿದ್ದಲು ಮತ್ತು ರಸಗೊಬ್ಬರಗಳ ಸಾಗಾಟವನ್ನು ಸುಲಭಗೊಳಿಸಲು ಮತ್ತು ಸಾರಿಗೆ ವೆಚ್ಚವನ್ನು ಕಡಿಮೆ ಮಾಡಲು ಟ್ರಂಪ್ ಈ ಕ್ರಮ ಕೈಗೊಂಡಿದ್ದಾರೆ. ಈಗ ವಿದೇಶಿ ಧ್ವಜ ಹೊಂದಿರುವ ಹಡಗುಗಳು ಕೂಡ ಅಮೆರಿಕದ ಬಂದರುಗಳ ನಡುವೆ ಈ ಅಗತ್ಯ ವಸ್ತುಗಳನ್ನು ಸಾಗಿಸಬಹುದಾಗಿದೆ.
ಸಾಮಾನ್ಯ ಜನರ ಮೇಲೆ ಇದರ ಪರಿಣಾಮವೇನು?
ಈ ನಿರ್ಧಾರದಿಂದಾಗಿ ತೈಲ ಮತ್ತು ಗ್ಯಾಸ್ ಸಾಗಾಟದ ಲಜಿಸ್ಟಿಕ್ಸ್ ಸರಳವಾಗಲಿದ್ದು, ಸಾರಿಗೆ ವೆಚ್ಚ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಲಿದೆ. ತಜ್ಞರ ಪ್ರಕಾರ, ಇದು ಪೆಟ್ರೋಲ್ ಬೆಲೆಯಲ್ಲಿ ಪ್ರತಿ ಗ್ಯಾಲನ್ಗೆ ಸುಮಾರು 3 ರಿಂದ 10 ಸೆಂಟ್ಸ್ಗಳಷ್ಟು ಏರಿಕೆಯನ್ನು ತಡೆಯಬಹುದು ಅಥವಾ ಕಡಿಮೆ ಮಾಡಬಹುದು. ಇದು ಬೆಲೆಯನ್ನು ತೀವ್ರವಾಗಿ ಇಳಿಸದಿದ್ದರೂ, ಬೆಲೆ ಏರಿಕೆಯ ವೇಗಕ್ಕೆ ಬ್ರೇಕ್ ಹಾಕುವ ನಿರೀಕ್ಷೆಯಿದೆ.
