ಬೆಂಗಳೂರು :ಸಾಫ್ಟ್ವೇರ್ ಇಂಜಿನಿಯರ್ನಿಂದ ‘ಮದುವೆ ದಂಧೆ’!; ಇಬ್ಬರು ಹೆಂಡಂದಿರಿದ್ದರೂ ಮೂರನೇ ಮದುವೆಗೆ ಮುಂದಾದ ಕಿಲಾಡಿ ಟೆಕ್ಕಿ ಗರ್ಭಿಣಿ ಪತ್ನಿಗೆ ಲಾಕ್!
ಬೆಂಗಳೂರು: ಕೈತುಂಬಾ ಸಂಬಳ ಬರುವ ಕೆಲಸ, ಸಮಾಜದಲ್ಲಿ ಗೌರವಯುತ ಸಾಫ್ಟ್ವೇರ್ ಇಂಜಿನಿಯರ್ ಹುದ್ದೆ. ಆದರೆ ಈತನ ಅಸಲಿ ಬಿಸಿನೆಸ್ ಮಾತ್ರ ಮದುವೆ ಹೆಸರಿನಲ್ಲಿ ಅಮಾಯಕ ಹೆಣ್ಣುಮಕ್ಕಳ ಜೀವನದ ಜೊತೆ ಆಟವಾಡುವುದು! ಜಿಗಣಿಯ ಖಾಸಗಿ ಕಂಪನಿಯ ಇಂಜಿನಿಯರ್ ರವಿ ಎಂಬಾತನ ಕಾಮುಕ ಬಣ್ಣ ಈಗ ಬಯಲಾಗಿದ್ದು, ಗರ್ಭಿಣಿ ಪತ್ನಿಯ ಸಮಯಪ್ರಜ್ಞೆಯಿಂದ ಈತನ ‘ಮದುವೆ ದಂಧೆ’ ಪೊಲೀಸರ ಮೆಟ್ಟಿಲೇರಿದೆ.
ಮದುವೆಯೇ ಈತನ ಹವ್ಯಾಸ: ತುಮಕೂರು ಮೂಲದ ರವಿ ಈಗಾಗಲೇ ಇಬ್ಬರು ಯುವತಿಯರನ್ನು ಮದುವೆಯಾಗಿ ವಂಚಿಸಿದ್ದಾನೆ. ಮೊದಲ ಪತ್ನಿ ಗರ್ಭಿಣಿಯಾಗಿದ್ದು, ಆಕೆಯನ್ನು ಮನೆಯಿಂದ ಹೊರಹಾಕಿ ಎರಡನೇ ಮದುವೆಯಾಗಿದ್ದ. ಅಷ್ಟಕ್ಕೇ ನಿಲ್ಲದ ಈ ಕಾಮುಕ, ಈಗ ಮ್ಯಾಟ್ರಿಮೋನಿ ಸೈಟ್ ಮೂಲಕ ಮತ್ತೊಬ್ಬ ಯುವತಿಯನ್ನು ನಂಬಿಸಿ ನಿಶ್ಚಿತಾರ್ಥವನ್ನೂ ಮಾಡಿಕೊಂಡಿದ್ದ. ಶರ್ಟ್ ಬದಲಿಸಿದಂತೆ ಹೆಂಡಂದಿರನ್ನು ಬದಲಿಸುವ ಈತನ ಕೃತ್ಯಕ್ಕೆ ಈತನ ಕುಟುಂಬಸ್ಥರೇ ಸಾಥ್ ನೀಡುತ್ತಿದ್ದರು ಎಂಬ ಆಘಾತಕಾರಿ ಮಾಹಿತಿ ಹೊರಬಂದಿದೆ.
ಹಣ ಪೀಕುವುದೇ ಇವನ ಗುರಿ: ಮದುವೆಯಾಗುವ ಯುವತಿಯರಿಂದ ಹಣ ಮತ್ತು ಚಿನ್ನಾಭರಣ ಪೀಕುವುದನ್ನೇ ಈತ ಹವ್ಯಾಸ ಮಾಡಿಕೊಂಡಿದ್ದ. ಮೂರನೇ ಮದುವೆಯ ನಿಶ್ಚಿತಾರ್ಥದ ವಿಷಯ ತಿಳಿದ ಮೊದಲ ಪತ್ನಿ, ಧೈರ್ಯ ಮಾಡಿ ಹುಡುಗಿಯ ಮನೆಗೆ ತೆರಳಿ ಈತನ ಅಸಲಿ ರೂಪವನ್ನು ಬಯಲು ಮಾಡಿದ್ದಾರೆ. ಇದರಿಂದ ಆಕ್ರೋಶಗೊಂಡ ಹುಡುಗಿಯ ಕಡೆಯವರು ರವಿಗೆ ಚೆನ್ನಾಗಿ ಗೂಸಾ ನೀಡಿದ್ದು, ಆತನ ಕಿಲಾಡಿ ಆಟಕ್ಕೆ ಬ್ರೇಕ್ ಹಾಕಿದ್ದಾರೆ.
ಪೊಲೀಸ್ ಕಸ್ಟಡಿಯಲ್ಲಿ ಟೆಕ್ಕಿ: ಮೊದಲ ಪತ್ನಿ ನೀಡಿದ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೆತ್ತಿಕೊಂಡಿದ್ದಾರೆ. ಇಂಜಿನಿಯರ್ ರವಿ ಇನ್ಯಾರಿಗೆಲ್ಲಾ ವಂಚಿಸಿದ್ದಾನೆ ಮತ್ತು ಈ ದಂಧೆಯಲ್ಲಿ ಈತನ ಕುಟುಂಬದ ಪಾತ್ರವೇನು ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ. ಪ್ರತಿಷ್ಠಿತ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರೂ ಇಂತಹ ನೀಚ ಕೃತ್ಯಕ್ಕೆ ಮುಂದಾಗಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಇದನ್ನು ಓದಿ : Mangaluru : ಪಾರ್ಕಿಂಗ್ ಇಲ್ಲದೆ ಮಂಗಳೂರು ಸಭಾಂಗಣಗಳ ಮೇಲೆ ಪ್ರಕರಣ ದಾಖಲು
