Fitness Guidance : ಫಿಟ್‌ನೆಸ್ ಕಾಪಾಡಿಕೊಳ್ಳಲು ವ್ಯಾಯಾಮ ಎಷ್ಟು ಅವಶ್ಯವೋ, ದೇಹಕ್ಕೆ ಸಾಕಷ್ಟು ವಿಶ್ರಾಂತಿ ನೀಡುವುದು ಕೂಡ ಅಷ್ಟೇ ಮುಖ್ಯ. ನಿರಂತರವಾಗಿ ಜಿಮ್‌ನಲ್ಲಿ ಕಷ್ಟಪಟ್ಟು ವರ್ಕೌಟ್ ಮಾಡುವುದರಿಂದ ಸ್ನಾಯುಗಳು ದಣಿದುಹೋಗುತ್ತವೆ. ಅಂತಹ ಸಂದರ್ಭಗಳಲ್ಲಿ ಈ ಕೆಳಗಿನ 7 ಲಕ್ಷಣಗಳು ಕಂಡುಬಂದರೆ ಜಿಮ್‌ಗೆ ಹೋಗುವುದನ್ನು ತಪ್ಪಿಸಿ, ದೇಹಕ್ಕೆ ವಿಶ್ರಾಂತಿ ನೀಡುವುದು ನಿಮ್ಮ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.
- ಸ್ನಾಯುಗಳಲ್ಲಿ ತೀವ್ರ ನೋವು: ಹಿಂದಿನ ದಿನ ವರ್ಕೌಟ್ ಮಾಡಿದ ಬಳಿಕ ಮರುದಿನ ಮೈಕೈ ವಿಪರೀತ ನೋಯುತ್ತಿದ್ದರೆ, ನಿಮ್ಮ ದೇಹಕ್ಕೆ ವಿಶ್ರಾಂತಿಯ ಅಗತ್ಯವಿದೆ ಎಂಬುದನ್ನು ಇದು ಸೂಚಿಸುತ್ತದೆ. ಈ ಸಮಯದಲ್ಲಿ ಸರಿಯಾದ ವಿಶ್ರಾಂತಿ ಸಿಕ್ಕರೆ ಮಾತ್ರ ಸ್ನಾಯುಗಳು ಬೇಗ ಚೇತರಿಸಿಕೊಂಡು ಬಲಗೊಳ್ಳುತ್ತವೆ.
- ತೀವ್ರ ಬಳಲಿಕೆ ಮತ್ತು ಆಯಾಸ: ರಾತ್ರಿ ಸರಿಯಾಗಿ ನಿದ್ರೆ ಬಾರದೆ, ಬೆಳಿಗ್ಗೆ ಎದ್ದಾಗ ದೇಹದಲ್ಲಿ ಯಾವುದೇ ಚೈತನ್ಯವಿಲ್ಲದೆ ಸುಸ್ತಾಗಿದ್ದರೆ ಅಂದು ಜಿಮ್ ಕಡೆ ಹೋಗದಿರುವುದೇ ಒಳ್ಳೆಯದು. ಸುಸ್ತಾದ ಮೈಯೊಂದಿಗೆ ಬಲವಂತವಾಗಿ ವ್ಯಾಯಾಮ ಮಾಡಿದರೆ ಗಾಯಗಳಾಗುವ ಸಂಭವ ಹೆಚ್ಚಿರುತ್ತದೆ.
- ಮಾನಸಿಕ ಒತ್ತಡ: ಕಚೇರಿಯ ಕೆಲಸದ ಒತ್ತಡ ಅಥವಾ ಇತ್ಯಾದಿ ಚಿಂತೆಗಳಿಂದ ಮನಸ್ಸು ಹೈರಾಣಾಗಿದ್ದರೆ ಆ ದಿನ ಜಿಮ್‌ಗೆ ರಜೆ ಹಾಕಿ. ಬದಲಿಗೆ, ಹಸಿರಿನ ನಡುವೆ ಸ್ವಲ್ಪ ಸಮಯ ಕಳೆಯುವುದು, ಶಾಂತವಾಗಿ ನಡೆದಾಡುವುದು ಅಥವಾ ಹಗುರವಾದ ಯೋಗ ಮಾಡುವುದರಿಂದ ಮನಸ್ಸಿಗೆ ನೆಮ್ಮದಿ ಸಿಗುತ್ತದೆ.
- ಅನಾರೋಗ್ಯದ ಲಕ್ಷಣಗಳು: ಮೈಕೈ ನೋವು, ಜ್ವರ, ನೆಗಡಿ ಅಥವಾ ಕೆಮ್ಮು ಇದ್ದಾಗ ಯಾವುದೇ ಕಾರಣಕ್ಕೂ ಜಿಮ್‌ಗೆ ಹೋಗಬೇಡಿ. ಇಂತಹ ಪರಿಸ್ಥಿತಿಯಲ್ಲಿ ವರ್ಕೌಟ್ ಮಾಡಿದರೆ ನಿಮ್ಮ ರೋಗನಿರೋಧಕ ಶಕ್ತಿ ಮತ್ತಷ್ಟು ಕುಗ್ಗುತ್ತದೆ, ಜೊತೆಗೆ ಜಿಮ್‌ನಲ್ಲಿರುವ ಇತರರಿಗೂ ಸೋಂಕು ಹರಡುವ ಭೀತಿ ಇರುತ್ತದೆ.
- ಮೈಗೆ ಗಾಯಗಳಾದಾಗ: ಸ್ನಾಯು ಸೆಳೆತ, ಸಣ್ಣಪುಟ್ಟ ಗಾಯಗಳು ಅಥವಾ ಕೀಲುಗಳಲ್ಲಿ ನೋವು ಕಾಣಿಸಿಕೊಂಡ ಕೂಡಲೇ ವ್ಯಾಯಾಮ ಮಾಡುವುದನ್ನು ನಿಲ್ಲಿಸಿ. ನೋವನ್ನು ಲೆಕ್ಕಿಸದೆ ಜಿಮ್ ಮುಂದುವರಿಸಿದರೆ ಗಾಯ ಮತ್ತಷ್ಟು ಉಲ್ಬಣಗೊಳ್ಳುವ ಸಾಧ್ಯತೆ ಇರುತ್ತದೆ.
- ಸತತ ಕಠಿಣ ತರಬೇತಿ: ವಾರದ ಐದಾರು ದಿನಗಳು ಬಿಡುವಿಲ್ಲದೆ ಕಠಿಣ ವ್ಯಾಯಾಮಗಳನ್ನು ಮಾಡಿದ್ದರೆ, ವಾರಕ್ಕೊಮ್ಮೆ ಅಥವಾ ಆಗಾಗ ದೇಹಕ್ಕೆ ಪೂರ್ಣ ಪ್ರಮಾಣದ ವಿರಾಮ ನೀಡುವುದು ಕಡ್ಡಾಯವಾಗಿದೆ.
- ಅತಿಯಾದ ಬ್ಯುಸಿ ವೇಳಾಪಟ್ಟಿ: ನಿತ್ಯದ ಕೆಲಸಗಳ ಗೋಜಲಿನಲ್ಲಿ ಸಮಯದ ಅಭಾವವಿರುವಾಗ ಗಡಿಬಿಡಿಯಲ್ಲಿ ಜಿಮ್‌ಗೆ ಓಡುವುದಕ್ಕಿಂತ, ಆ ದಿನ ಪ್ರಶಾಂತವಾಗಿ ವಿಶ್ರಾಂತಿ ಪಡೆದು ಮರುದಿನ ಹೊಸ ಹುಮ್ಮಸ್ಸಿನೊಂದಿಗೆ ಜಿಮ್‌ಗೆ ಹಾಜರಾಗುವುದು ಉತ್ತಮ.
ನೆನಪಿಡಿ: ವಿಶ್ರಾಂತಿಯ ದಿನವೆಂದರೆ ಇಡೀ ದಿನ ಮಲಗಿಕೊಂಡೇ ಇರುವುದಲ್ಲ, ಬದಲಿಗೆ ಹಗುರವಾದ ವಾಕಿಂಗ್ ಅಥವಾ ಸರಳ ಸ್ಟ್ರೆಚಿಂಗ್ ಮಾಡುವ ಮೂಲಕವೂ ದಿನವನ್ನು ಆ್ಯಕ್ಟಿವ್ ಆಗಿ ಇಟ್ಟುಕೊಳ್ಳಬಹುದು.
ಇದನ್ನು ಓದಿ : Udupi : ಅಂಡರ್‌ವರ್ಲ್ಡ್ ಹೇಮಂತ್ ಪೂಜಾರಿ ಸಹಚರ ಬಂಧನ — 4.13 ಲಕ್ಷ ವಶ!
