ಬೈರೂತ್ : ದಕ್ಷಿಣ ಲೆಬನಾನ್ನ ಪಟ್ಟಣವೊಂದರ ಮೇಲೆ ಇಸ್ರೇಲ್ ನಡೆಸಿದ ಭೀಕರ ವೈಮಾನಿಕ ದಾಳಿಯಲ್ಲಿ ಪ್ರಖ್ಯಾತ ಪತ್ರಕರ್ತೆ ಅಮಲ್ ಖಲೀಲ್ (43) ಸಾವನ್ನಪ್ಪಿದ್ದಾರೆ. ಅಲ್-ಅಖ್ಬರ್ ಪತ್ರಿಕೆಯಲ್ಲಿ ಕೆಲಸ ಮಾಡುತ್ತಿದ್ದ ಅವರು, ಅಲ್-ತೈರಿ ಪಟ್ಟಣದ ಬಳಿ ವರದಿಗಾರಿಕೆ ಮಾಡುತ್ತಿದ್ದಾಗ ಈ ದುರಂತ ಸಂಭವಿಸಿದೆ. ದಾಳಿಯಲ್ಲಿ ಅವರ ಜೊತೆಗಿದ್ದ ಫ್ರೀಲಾನ್ಸ್ ಛಾಯಾಗ್ರಾಹಕಿ ಝೈನಾಬ್ ಫರಾಜ್ ತೀವ್ರವಾಗಿ ಗಾಯಗೊಂಡಿದ್ದಾರೆ. ಏಪ್ರಿಲ್ 16 ರಂದು ಇಸ್ರೇಲ್ ಮತ್ತು ಹಿಜ್ಬುಲ್ಲಾ ನಡುವೆ 10 ದಿನಗಳ ಕದನ ವಿರಾಮ ಘೋಷಣೆಯಾದ ನಂತರ ನಡೆದ ಅತ್ಯಂತ ರಕ್ತಸಿಕ್ತ ದಿನ ಇದಾಗಿದ್ದು, ಬುಧವಾರ ಒಂದೇ ದಿನ ಐವರು ಪ್ರಾಣ ಕಳೆದುಕೊಂಡಿದ್ದಾರೆ.
ವರದಿಗಳ ಪ್ರಕಾರ, ಅಮಲ್ ಖಲೀಲ್ ಮತ್ತು ಝೈನಾಬ್ ಫರಾಜ್ ಪ್ರಯಾಣಿಸುತ್ತಿದ್ದ ವಾಹನದ ಮುಂದಿದ್ದ ಕಾರಿನ ಮೇಲೆ ಇಸ್ರೇಲ್ ಮೊದಲು ದಾಳಿ ನಡೆಸಿತು. ಪ್ರಾಣ ಉಳಿಸಿಕೊಳ್ಳಲು ಅವರು ಹತ್ತಿರದ ಮನೆಯೊಂದಕ್ಕೆ ಓಡಿ ಹೋದಾಗ, ಇಸ್ರೇಲ್ ಆ ಮನೆಯನ್ನೇ ಗುರಿಯಾಗಿಸಿ ಮತ್ತೆ ದಾಳಿ ಮಾಡಿದೆ. ರಕ್ಷಣಾ ತಂಡಗಳು ಸ್ಥಳಕ್ಕೆ ಆಗಮಿಸಿದಾಗ ಇಸ್ರೇಲ್ ಸೇನೆಯು ಸೌಂಡ್ ಗ್ರನೇಡ್ ಮತ್ತು ಗುಂಡಿನ ದಾಳಿ ನಡೆಸುವ ಮೂಲಕ ಗಾಯಾಳುಗಳನ್ನು ತಲುಪದಂತೆ ತಡೆಯೊಡ್ಡಿತು ಎಂದು ಲೆಬನಾನ್ನ ಆರೋಗ್ಯ ಸಚಿವಾಲಯ ಮತ್ತು ಪತ್ರಕರ್ತರ ಸಂಘಟನೆಗಳು ಗಂಭೀರವಾಗಿ ಆರೋಪಿಸಿವೆ. ಸುಮಾರು ಏಳು ಗಂಟೆಗಳ ಸುದೀರ್ಘ ಕಾರ್ಯಾಚರಣೆಯ ನಂತರ ಅವಶೇಷಗಳ ಅಡಿಯಿಂದ ಅಮಲ್ ಅವರ ಮೃತದೇಹವನ್ನು ಹೊರತೆಗೆಯಲಾಗಿದೆ.
ಈ ಘಟನೆಯ ಬಗ್ಗೆ ಪ್ರತಿಕ್ರಿಯಿಸಿರುವ ಇಸ್ರೇಲ್ ಸೇನೆಯು, ತಾವು ಪತ್ರಕರ್ತರನ್ನು ಗುರಿಯಾಗಿಸಿಲ್ಲ ಎಂದು ಹೇಳಿದೆ. ಹಿಜ್ಬುಲ್ಲಾ ಉಗ್ರರು ಬಳಸುತ್ತಿದ್ದ ವಾಹನಗಳು ಬಫರ್ ಝೋನ್ ಪ್ರವೇಶಿಸಿ ಸೈನ್ಯಕ್ಕೆ ಬೆದರಿಕೆ ಒಡ್ಡಿದ ಕಾರಣ ದಾಳಿ ನಡೆಸಿದ್ದಾಗಿ ಅದು ಸಮರ್ಥಿಸಿಕೊಂಡಿದೆ. ಮಾರ್ಚ್ 2 ರಂದು ಹಿಜ್ಬುಲ್ಲಾ ನಡೆಸಿದ ದಾಳಿಗೆ ಪ್ರತಿಯಾಗಿ ಇಸ್ರೇಲ್ ಆರಂಭಿಸಿರುವ ಈ ಯುದ್ಧದಲ್ಲಿ ಇದುವರೆಗೆ 2,400 ಕ್ಕೂ ಹೆಚ್ಚು ಜನರು ಲೆಬನಾನ್ನಲ್ಲಿ ಸಾವನ್ನಪ್ಪಿದ್ದಾರೆ. ಗಡಿ ಭಾಗದಲ್ಲಿ ಬಫರ್ ಝೋನ್ ನಿರ್ಮಿಸಲು ಇಸ್ರೇಲ್ ಪ್ರಯತ್ನಿಸುತ್ತಿದ್ದು, ಈ ಸಂಘರ್ಷ ಜಾಗತಿಕ ಮಟ್ಟದಲ್ಲಿ ತೀವ್ರ ಕಳವಳಕ್ಕೆ ಕಾರಣವಾಗಿದೆ.
