ನವದೆಹಲಿ : ಅತನು ಚಕ್ರವರ್ತಿ ಅವರು ತಮ್ಮ ರಾಜೀನಾಮೆಗೆ ನೀಡಿರುವ ಕಾರಣ ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ. “ಬ್ಯಾಂಕಿನ ಒಳಗಿನ ಕೆಲವು ಪದ್ಧತಿಗಳು ಮತ್ತು ಘಟನೆಗಳು ನನ್ನ ವೈಯಕ್ತಿಕ ಮೌಲ್ಯಗಳು ಮತ್ತು ನೈತಿಕತೆಗೆ (Ethics) ಹೊಂದಿಕೆಯಾಗುತ್ತಿಲ್ಲ” ಎಂದು ಅವರು ತಮ್ಮ ಪತ್ರದಲ್ಲಿ ನೇರವಾಗಿ ಉಲ್ಲೇಖಿಸಿದ್ದಾರೆ. ಕಳೆದ ಎರಡು ವರ್ಷಗಳಿಂದ ಬ್ಯಾಂಕಿನಲ್ಲಿ ನಡೆಯುತ್ತಿರುವ ಕೆಲವು ಪ್ರಕ್ರಿಯೆಗಳ ಬಗ್ಗೆ ಅವರು ಅಸಮಾಧಾನ ವ್ಯಕ್ತಪಡಿಸಿದ್ದು, ತಮ್ಮ ತತ್ವಗಳಿಗೆ ವಿರುದ್ಧವಾಗಿ ಕೆಲಸ ಮಾಡಲು ಸಾಧ್ಯವಿಲ್ಲ ಎಂದು ಅಧಿಕಾರದಿಂದ ಕೆಳಗಿಳಿದಿದ್ದಾರೆ.
ಷೇರು ಮಾರುಕಟ್ಟೆಯಲ್ಲಿ ಭಾರಿ ಕುಸಿತ ಮತ್ತು ಆರ್ಥಿಕ ನಷ್ಟ ಈ ರಾಜೀನಾಮೆ ಸುದ್ದಿ ಹೊರಬರುತ್ತಿದ್ದಂತೆ ಷೇರು ಮಾರುಕಟ್ಟೆಯಲ್ಲಿ HDFC ಬ್ಯಾಂಕ್ ಷೇರುಗಳು ಪಾತಾಳಕ್ಕೆ ಕುಸಿದಿವೆ. ಭಾರತೀಯ ಮಾರುಕಟ್ಟೆಯಲ್ಲಿ ಬ್ಯಾಂಕಿನ ಷೇರು ಬೆಲೆ ಶೇ. 4.73 ರಷ್ಟು ಇಳಿಕೆಯಾಗಿದ್ದು, ಹೂಡಿಕೆದಾರರಿಗೆ ಸಾವಿರಾರು ಕೋಟಿ ರೂಪಾಯಿ ನಷ್ಟವಾಗಿದೆ. ಅಷ್ಟೇ ಅಲ್ಲದೆ, ಅಮೆರಿಕಾದಲ್ಲಿ ಲಿಸ್ಟ್ ಆಗಿರುವ ಬ್ಯಾಂಕಿನ ADR (American Depositary Receipt) ಷೇರುಗಳು ಕೂಡ ರಾತ್ರೋರಾತ್ರಿ ಶೇ. 7 ಕ್ಕಿಂತ ಹೆಚ್ಚು ಕುಸಿತ ಕಂಡು ಜಾಗತಿಕ ಹೂಡಿಕೆದಾರರನ್ನು ಬೆಚ್ಚಿಬೀಳಿಸಿವೆ.
ತಕ್ಷಣವೇ ಎಂಟ್ರಿ ಕೊಟ್ಟ ರಿಸರ್ವ್ ಬ್ಯಾಂಕ್ (RBI) ಬ್ಯಾಂಕಿನ ಈ ಆಡಳಿತಾತ್ಮಕ ಬಿಕ್ಕಟ್ಟನ್ನು ನಿಭಾಯಿಸಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ತಕ್ಷಣವೇ ಮಧ್ಯಪ್ರವೇಶಿಸಿದೆ. ಕೆಕಿ ಮಿಸ್ತ್ರಿ ಅವರನ್ನು ಮೂರು ತಿಂಗಳ ಅವಧಿಗೆ ಅನ್ವಯವಾಗುವಂತೆ HDFC ಬ್ಯಾಂಕ್ನ ಮಧ್ಯಂತರ ಅಧ್ಯಕ್ಷರನ್ನಾಗಿ ನೇಮಕ ಮಾಡಲು RBI ಒಪ್ಪಿಗೆ ನೀಡಿದೆ. ಕೆಕಿ ಮಿಸ್ತ್ರಿ ಅವರು ಈ ಹಿಂದೆ HDFC ಲಿಮಿಟೆಡ್ನ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ ಅನುಭವ ಹೊಂದಿದ್ದಾರೆ. ಸದ್ಯಕ್ಕೆ ಬ್ಯಾಂಕಿನ ಆಡಳಿತವು ಸುಸ್ಥಿತಿಯಲ್ಲಿದೆ ಮತ್ತು ಯಾವುದೇ ದೊಡ್ಡ ಮಟ್ಟದ ಆತಂಕ ಬೇಡ ಎಂದು RBI ಭರವಸೆ ನೀಡಿದೆ.
ಭವಿಷ್ಯದ ಮೇಲೆ ಇದರ ಪರಿಣಾಮವೇನು? HDFC ಮತ್ತು HDFC ಬ್ಯಾಂಕ್ ವಿಲೀನದ ನಂತರದ ಲಾಭಗಳು ಇನ್ನೂ ಪೂರ್ಣ ಪ್ರಮಾಣದಲ್ಲಿ ಲಭ್ಯವಾಗುವ ಮೊದಲೇ ಇಂತಹ ದೊಡ್ಡ ಮಟ್ಟದ ರಾಜೀನಾಮೆ ಸಂಭವಿಸಿರುವುದು ಬ್ಯಾಂಕಿನ ಭವಿಷ್ಯದ ಮೇಲೆ ನೆರಳು ಬೀರಿದೆ. ಜೆಪಿ ಮೋರ್ಗಾನ್ನಂತಹ ದೊಡ್ಡ ಬ್ರೋಕರೇಜ್ ಸಂಸ್ಥೆಗಳು ಸದ್ಯಕ್ಕೆ ಈ ಷೇರಿನ ಬಗ್ಗೆ ಎಚ್ಚರಿಕೆಯ ನಿಲುವು ತಳೆದಿವೆ. ಬ್ಯಾಂಕಿನ ಒಳಗೆ ನಡೆಯುತ್ತಿರುವ ಆ ‘ನೈತಿಕವಲ್ಲದ’ ಪದ್ಧತಿಗಳು ಯಾವುವು ಎಂಬುದು ಸ್ಪಷ್ಟವಾಗದ ಹೊರತು ಮಾರುಕಟ್ಟೆಯಲ್ಲಿನ ಈ ಅಸ್ಥಿರತೆ ಮುಂದುವರಿಯುವ ಸಾಧ್ಯತೆಯಿದೆ.
