ಅಮೇರಿಕಾ : ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ಯುದ್ಧದ ಬಗ್ಗೆ ನೀಡಿರುವ ಹೊಸ ಹೇಳಿಕೆ ಇಡೀ ವಿಶ್ವದ ಗಮನ ಸೆಳೆದಿದೆ. “ಇನ್ನು ಕೇವಲ 2 ರಿಂದ 3 ವಾರಗಳಲ್ಲಿ ಇರಾನ್ ಮೇಲಿನ ಯುದ್ಧ ಕೊನೆಗೊಳ್ಳಲಿದೆ” ಎಂದು ಟ್ರಂಪ್ ಘೋಷಿಸಿದ್ದಾರೆ. ಇರಾನ್ ಅನ್ನು ಅಕ್ಷರಶಃ ‘ಶಿಲಾಯುಗದ’ ಕಾಲಕ್ಕೆ ತಳ್ಳಿದ್ದೇವೆ ಮತ್ತು ಅವರು ಇನ್ನು ಮುಂದೆ ಅಣ್ವಸ್ತ್ರ ತಯಾರಿಸಲು ಸಾಧ್ಯವಾಗದಂತೆ ನಾಶ ಮಾಡಿದ್ದೇವೆ, ಆದ್ದರಿಂದ ಯುದ್ಧ ನಿಲ್ಲಿಸಲು ಯಾವುದೇ ಒಪ್ಪಂದದ ಅವಶ್ಯಕತೆಯಿಲ್ಲ ಎಂದು ಅವರು ತಿಳಿಸಿದ್ದಾರೆ.
ಇದೇ ಸಮಯದಲ್ಲಿ ಟ್ರಂಪ್ ತಮ್ಮ ಮಿತ್ರರಾಷ್ಟ್ರಗಳಾದ ಬ್ರಿಟನ್ ಮತ್ತು ಫ್ರಾನ್ಸ್ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಈ ಯುದ್ಧದಲ್ಲಿ ಅಮೆರಿಕಾಕ್ಕೆ ಸಹಾಯ ಮಾಡಲು ನಿರಾಕರಿಸಿದ ದೇಶಗಳಿಗೆ ಎಚ್ಚರಿಕೆ ನೀಡಿರುವ ಅವರು, “ನಿಮ್ಮ ತೈಲವನ್ನು ನೀವೇ ಹುಡುಕಿಕೊಳ್ಳಿ, ಅಮೆರಿಕಾ ಇನ್ಮುಂದೆ ನಿಮಗೆ ಸಹಾಯ ಮಾಡುವುದಿಲ್ಲ” ಎಂದು ಖಾರವಾಗಿ ಹೇಳಿದ್ದಾರೆ. ಅಮೆರಿಕಾದಲ್ಲಿ ಪೆಟ್ರೋಲ್ ಬೆಲೆ ಗಗನಕ್ಕೇರಿರುವುದರಿಂದ ದೇಶದ ಜನರ ಒತ್ತಡಕ್ಕೆ ಮಣಿದು ಟ್ರಂಪ್ ಈ ನಿರ್ಧಾರ ತಂದಿದ್ದಾರೆ ಎನ್ನಲಾಗುತ್ತಿದೆ.
ಆದರೆ, ವಿದೇಶಾಂಗ ತಜ್ಞರು ಟ್ರಂಪ್ ಅವರ ಈ ಮಾತನ್ನು ಅಷ್ಟು ಸುಲಭವಾಗಿ ನಂಬುತ್ತಿಲ್ಲ. ಈ ಹಿಂದೆಯೂ ಟ್ರಂಪ್ ಯುದ್ಧ ನಿಲ್ಲಿಸುವ ಬಗ್ಗೆ ಅನೇಕ ಡೆಡ್ಲೈನ್ಗಳನ್ನು ನೀಡಿದ್ದರು, ಆದರೆ ಯಾವುದೂ ನಿಜವಾಗಿಲ್ಲ. ಯುದ್ಧದ ಮೇಲಿನ ಹತೋಟಿ ತಪ್ಪುತ್ತಿರುವುದರಿಂದ ಟ್ರಂಪ್ ಇಂತಹ ಹೇಳಿಕೆ ನೀಡುತ್ತಿರಬಹುದು ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಯುದ್ಧ ನಿಂತರೆ ಮಾತ್ರ ಜಾಗತಿಕ ತೈಲ ಮಾರುಕಟ್ಟೆ ಮತ್ತು ಪೆಟ್ರೋಲ್ ಬೆಲೆ ಸಾಮಾನ್ಯ ಸ್ಥಿತಿಗೆ ಬರಲು ಸಾಧ್ಯ ಎಂಬುದು ಜನರ ಆಶಯವಾಗಿದೆ.
