ನವದೆಹಲಿ : ಕಾಕ್ರೋಚ್ ಜನತಾ ಪಾರ್ಟಿ (CJP) ಸಂಸ್ಥಾಪಕ ಅಭಿಜೀತ್ ದಿಪ್ಕೆ ಅವರಿಗೆ ಶನಿವಾರ ಜಂತರ್ ಮಂತರ್ನಲ್ಲಿ ಪ್ರತಿಭಟನೆ ನಡೆಸಲು ದೆಹಲಿ ಪೊಲೀಸರು ಅನುಮತಿ ನೀಡಿದ್ದಾರೆ. ಅಮೆರಿಕದಿಂದ ಆಗಮಿಸಿದ ದಿಪ್ಕೆ ಅವರು ಇಂದಿರಾ ಗಾಂಧಿ ಅಂತರರಾಷ್ಟ್ರೀಯ (IGI) ವಿಮಾನ ನಿಲ್ದಾಣದ ಟರ್ಮಿನಲ್-3ರಲ್ಲಿ ವಲಸೆ ಪ್ರಕ್ರಿಯೆ ಪೂರ್ಣಗೊಳಿಸಿದ ಬಳಿಕ ಕೆಲವು ಪೊಲೀಸ್ ಅಧಿಕಾರಿಗಳನ್ನು ಭೇಟಿಯಾದರು. ಈ ವೇಳೆ, ಸಿಜೆಪಿ ಪ್ರತಿಭಟನಾಕಾರರು ಪಾರ್ಲಿಮೆಂಟ್ ಸ್ಟ್ರೀಟ್ ಪೊಲೀಸ್ ಠಾಣೆಯ ಬಳಿ ಸೇರುವ ಬದಲು ನೇರವಾಗಿ ಜಂತರ್ ಮಂತರ್ಗೆ ಆಗಮಿಸುವಂತೆ ಪೊಲೀಸರು ಮನವಿ ಮಾಡಿಕೊಂಡಿದ್ದಾರೆ.
ಇದೇ ವೇಳೆ, ದಿಪ್ಕೆ ಅವರು ಟರ್ಮಿನಲ್-3ರ ಗೇಟ್ ಸಂಖ್ಯೆ 16ರಿಂದ ಹೊರಬರುವ ನಿರೀಕ್ಷೆ ಇತ್ತಾದರೂ, ನಿರ್ಗಮನ ದ್ವಾರದ ಬಳಿ ವಾಹನವನ್ನು ಸ್ವೀಕರಿಸಲು ವಿಮಾನ ನಿಲ್ದಾಣದ ಅಧಿಕಾರಿಗಳು ಅನುಮತಿ ನೀಡದ ಕಾರಣ ಅವರ ನಿರ್ಗಮನದಲ್ಲಿ ತೀವ್ರ ವಿಳಂಬ ಉಂಟಾಯಿತು. ತಮ್ಮ ಕಾರನ್ನು ಟರ್ಮಿನಲ್-3ರ ಹೊರಭಾಗದಲ್ಲಿರುವ ವಿವಿಐಪಿ ಪಾರ್ಕಿಂಗ್ ಪ್ರದೇಶಕ್ಕೆ ತರಲು ದಿಪ್ಕೆ ಅವರು ವಿಮಾನ ನಿಲ್ದಾಣ ನಿರ್ವಹಣಾ ಸಂಸ್ಥೆ ಜಿಎಂಆರ್ಗೆ ಮನವಿ ಮಾಡಿದ್ದರು. ಆದರೆ ಕಾರು ನಿಲ್ಲಿಸಿದ್ದ ಸಾಮಾನ್ಯ ಪಾರ್ಕಿಂಗ್ ಪ್ರದೇಶಕ್ಕೆ ತೆರಳಿ ವಾಹನವನ್ನು ಸ್ವೀಕರಿಸಲು ಅವರು ನಿರಾಕರಿಸಿದ್ದರು ಎಂದು ದೆಹಲಿ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಕಡೆಗೂ ಶನಿವಾರ ಬೆಳಿಗ್ಗೆ 9.17ರ ಸುಮಾರಿಗೆ ಟರ್ಮಿನಲ್-3ರಿಂದ ಹೊರಬಂದ ದಿಪ್ಕೆ ಅವರನ್ನು ಕ್ಯಾಬ್ನಲ್ಲಿ ಸ್ಥಳದಿಂದ ಕರೆದೊಯ್ಯಲಾಯಿತು.
