ಕತಾರ್ : ವಿಶ್ವದ ಅತಿದೊಡ್ಡ ದ್ರವೀಕೃತ ನೈಸರ್ಗಿಕ ಅನಿಲ (LNG) ರಫ್ತು ಘಟಕವಾಗಿರುವ ಕತಾರ್ನ ರಾಸ್ ಲಫಾನ್ (Ras Laffan) ಮೇಲೆ ಇರಾನ್ ಕ್ಷಿಪಣಿ ದಾಳಿ ನಡೆಸಿದೆ. ಈ ದಾಳಿಯಿಂದ ಘಟಕಕ್ಕೆ ‘ವ್ಯಾಪಕ ಹಾನಿ’ ಸಂಭವಿಸಿದೆ ಎಂದು ವರದಿಯಾಗಿದೆ. ಜಾಗತಿಕ ಅನಿಲ ಪೂರೈಕೆಯ ಶೇಕಡಾ 20ರಷ್ಟನ್ನು ಈ ಒಂದು ಘಟಕವೇ ಪೂರೈಸುತ್ತಿತ್ತು. ಈ ದಾಳಿಯ ನಂತರ ಕತಾರ್ ಸರ್ಕಾರವು ತನ್ನ ದೇಶದಲ್ಲಿದ್ದ ಇರಾನ್ನ ಮಿಲಿಟರಿ ಮತ್ತು ಭದ್ರತಾ ಸಿಬ್ಬಂದಿಯನ್ನು 24 ಗಂಟೆಯೊಳಗೆ ದೇಶ ಬಿಟ್ಟು ತೊರೆಯುವಂತೆ ಆದೇಶಿಸಿದೆ.
ಯುಎಇ ಮತ್ತು ಸೌದಿ ಮೇಲೂ ದಾಳಿ ಯತ್ನ: ಕತಾರ್ ಮಾತ್ರವಲ್ಲದೆ, ಅಬುಧಾಬಿಯ ಹಬ್ಶನ್ (Habshan) ಅನಿಲ ಘಟಕದ ಮೇಲೂ ದಾಳಿ ನಡೆದಿದ್ದು, ಕ್ಷಿಪಣಿಯ ಅವಶೇಷಗಳು ಬಿದ್ದ ಕಾರಣ ಘಟಕವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿದೆ. ಇತ್ತ ಸೌದಿ ಅರೇಬಿಯಾದ ಪೂರ್ವ ಭಾಗದ ಗ್ಯಾಸ್ ಘಟಕದ ಮೇಲೆ ನಡೆದ ಡ್ರೋನ್ ದಾಳಿಯನ್ನು ಸೌದಿ ಸೇನೆ ಯಶಸ್ವಿಯಾಗಿ ತಡೆದಿದೆ. ಇಸ್ರೇಲ್ ಇತ್ತೀಚೆಗೆ ಇರಾನ್ನ ‘ಸೌತ್ ಪಾರ್ಸ್’ ಅನಿಲ ಕ್ಷೇತ್ರದ ಮೇಲೆ ದಾಳಿ ಮಾಡಿದ ನಂತರ ಇರಾನ್ ಈ ಪ್ರತೀಕಾರದ ಕ್ರಮ ಕೈಗೊಂಡಿದೆ.
ಜಾಗತಿಕವಾಗಿ ತೈಲ ಬೆಲೆ ಏರಿಕೆ: ಈ ದಾಳಿಗಳ ಬೆನ್ನಲ್ಲೇ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಮತ್ತು ಅನಿಲದ ಬೆಲೆಗಳು ಭಾರಿ ಏರಿಕೆ ಕಂಡಿವೆ. ಬ್ರೆಂಟ್ ಕಚ್ಚಾ ತೈಲದ ಬೆಲೆ ಶೇಕಡಾ 8ರಷ್ಟು ಏರಿಕೆಯಾಗಿದ್ದು, ಪ್ರತಿ ಬ್ಯಾರೆಲ್ಗೆ ಸುಮಾರು 112 ಡಾಲರ್ಗೆ ತಲುಪಿದೆ. ಏಷ್ಯಾ ಮತ್ತು ಯುರೋಪ್ ರಾಷ್ಟ್ರಗಳು ವಿದ್ಯುತ್ ಉತ್ಪಾದನೆಗೆ ಆಮದು ಮಾಡಿಕೊಳ್ಳುವ ಅನಿಲದ ಮೇಲೆ ಹೆಚ್ಚು ಅವಲಂಬಿತವಾಗಿರುವುದರಿಂದ, ಈ ಪೂರೈಕೆ ವ್ಯತ್ಯಯವು ಜಾಗತಿಕ ಆರ್ಥಿಕತೆಯ ಮೇಲೆ ದೊಡ್ಡ ಹೊಡೆತ ನೀಡುವ ಸಾಧ್ಯತೆಯಿದೆ.
