ಇಸ್ಫಹಾನ್ : ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ನಡೆಸುತ್ತಿರುವ ದಾಳಿಗಳು ಈಗ ಮತ್ತಷ್ಟು ತೀವ್ರಗೊಂಡಿದ್ದು, ಕೇಂದ್ರ ಇರಾನ್ನ ಪ್ರಮುಖ ನಗರಗಳು ಹಾಗೂ ನೆರೆಹೊರೆಯ ಗಲ್ಫ್ ರಾಷ್ಟ್ರಗಳಲ್ಲಿ ಭಾರಿ ಸಾವು-ನೋವು ಸಂಭವಿಸಿದೆ. ಬುಧವಾರ ಸಂಜೆ ಇರಾನ್ನ ಶಿರಾಜ್ (Shiraz) ಪ್ರಾಂತ್ಯದ ವಸತಿ ಪ್ರದೇಶದ ಮೇಲೆ ನಡೆದ ಭೀಕರ ವೈಮಾನಿಕ ದಾಳಿಯಲ್ಲಿ ಇಬ್ಬರು ಹದಿಹರೆಯದ ಹುಡುಗರು ಸಾವನ್ನಪ್ಪಿದ್ದಾರೆ. ಮೃತಪಟ್ಟವರನ್ನು ಇಲ್ಯಾ ಮತ್ತು ಅಮೀರ್ ಹೊಸೇನ್ ಶರಾಫಿ ಎಂದು ಗುರುತಿಸಲಾಗಿದ್ದು, ಇವರು ಸ್ಥಳೀಯ ಹಳ್ಳಿಯ ನಿವಾಸಿಗಳಾಗಿದ್ದರು. ಈ ಘಟನೆಯ ಬೆನ್ನಲ್ಲೇ ಇಸ್ರೇಲ್ ಸೇನೆಯು ಇರಾನ್ನ ಆಯಕಟ್ಟಿನ ನಗರವಾದ ಇಸ್ಫಹಾನ್ (Isfahan) ಮೇಲೆ “ವ್ಯಾಪಕ ದಾಳಿಗಳ ಸರಣಿ”ಯನ್ನು ಆರಂಭಿಸಿರುವುದಾಗಿ ಘೋಷಿಸಿದೆ.
ಯುದ್ಧದ ಕಿಚ್ಚು ಈಗ ಕೇವಲ ಇರಾನ್ಗೆ ಸೀಮಿತವಾಗದೆ ನೆರೆಹೊರೆಯ ರಾಷ್ಟ್ರಗಳಿಗೂ ಹರಡುತ್ತಿದೆ. ಯುಎಇ ರಾಜಧಾನಿ ಅಬುದಾಬಿಯಲ್ಲಿ ಪ್ರತಿಬಂಧಿತ ಕ್ಷಿಪಣಿಯ ಅವಶೇಷಗಳು ರಸ್ತೆಗೆ ಬಿದ್ದ ಪರಿಣಾಮ ಇಬ್ಬರು ವ್ಯಕ್ತಿಗಳು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ. ಇದೇ ವೇಳೆ ಸೌದಿ ಅರೇಬಿಯಾ ತನ್ನ ಪೂರ್ವ ಪ್ರಾಂತ್ಯದತ್ತ ನುಗ್ಗಿ ಬಂದ ಸುಮಾರು 22 ಡ್ರೋನ್ಗಳನ್ನು ಹೊಡೆದುರುಳಿಸಿದೆ. ಕುವೈತ್ ಮತ್ತು ಬಹ್ರೇನ್ ಕೂಡ ಡ್ರೋನ್ ದಾಳಿಯ ಭೀತಿಯನ್ನು ಎದುರಿಸುತ್ತಿದ್ದು, ತಮ್ಮ ಪ್ರಮುಖ ತೈಲ ಮತ್ತು ಸೇನಾ ಕೇಂದ್ರಗಳ ರಕ್ಷಣೆಗಾಗಿ ಹೈ ಅಲರ್ಟ್ ಘೋಷಿಸಿವೆ.
ಇರಾನ್ನ ಒಳಭಾಗದಲ್ಲಿ ದಾಳಿಗಳು ನಿರಂತರವಾಗಿ ನಡೆಯುತ್ತಿದ್ದು, ಬಂದರ್ ಅಬ್ಬಾಸ್, ಕರಾಜ್ ಮತ್ತು ಅಫ್ಘಾನಿಸ್ತಾನ ಗಡಿಯ ಸಮೀಪವಿರುವ ಮಶಾದ್ ಹಾಗೂ ತಯಬಾದ್ ನಗರಗಳ ಮೇಲೂ ಬಾಂಬ್ ಮಳೆ ಸುರಿಯುತ್ತಿದೆ. ಇದುವರೆಗೆ ಈ ಯುದ್ಧದಿಂದ ದೂರವಿದ್ದ ಪ್ರದೇಶಗಳನ್ನೂ ಈಗ ಗುರಿಯಾಗಿಸಲಾಗುತ್ತಿರುವುದು ಆತಂಕ ಮೂಡಿಸಿದೆ. ಇತ್ತ ಇರಾನ್ ನಡೆಸಿದ ಪ್ರತಿ-ಕ್ಷಿಪಣಿ ದಾಳಿಯಿಂದ ಇಸ್ರೇಲ್ನ ಕಫರ್ ಖಾಸಿಂ ಎಂಬಲ್ಲಿ ಮೂವರು ಗಾಯಗೊಂಡಿದ್ದಾರೆ. ಟೆಲ್ ಅವಿವ್ ಮತ್ತು ಜೆರುಸಲೇಂನಲ್ಲಿ ನಿರಂತರವಾಗಿ ಎಚ್ಚರಿಕೆಯ ಸೈರನ್ ಸದ್ದು ಮೊಳಗುತ್ತಿದ್ದು, ಜನರು ಬಂಕರ್ಗಳಲ್ಲಿ ಆಶ್ರಯ ಪಡೆಯುತ್ತಿದ್ದಾರೆ.
ರಾಜತಾಂತ್ರಿಕವಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು “ಯುದ್ಧ ಕೊನೆಗೊಳಿಸುವ ಒಪ್ಪಂದವು ಅಂತಿಮ ಹಂತದಲ್ಲಿದೆ” ಎಂದು ಹೇಳುತ್ತಿದ್ದರೂ, ಇರಾನ್ ನಾಯಕರು ಅಂತಹ ಯಾವುದೇ ಮಾತುಕತೆ ನಡೆದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಟ್ರಂಪ್ ಅವರ 15 ಅಂಶಗಳ ಶಾಂತಿ ಪ್ರಸ್ತಾವನೆಯನ್ನು ತಿರಸ್ಕರಿಸಿರುವ ಇರಾನ್, ತನ್ನದೇ ಆದ 5 ಕಠಿಣ ಷರತ್ತುಗಳನ್ನು ಮುಂದಿಟ್ಟಿದೆ. ಈ ನಡುವೆ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆಯು ಪ್ರತಿ ಬ್ಯಾರೆಲ್ಗೆ 104 ಡಾಲರ್ ದಾಟಿದ್ದು, ವಿಮಾನಯಾನ ಮತ್ತು ಸರಕು ಸಾಗಣೆ ವೆಚ್ಚ ಏರಿಕೆಯಾಗುವ ಮೂಲಕ ಇಡೀ ವಿಶ್ವದ ಆರ್ಥಿಕತೆಯ ಮೇಲೆ ಕರಾಳ ಛಾಯೆ ಆವರಿಸಿದೆ.
