ಗಾಜಾ : ಇಸ್ರೇಲ್ನ ನೆಸೆಟ್ (ಸಂಸತ್ತು) ಕಳೆದ ವಾರ “ಭಯೋತ್ಪಾದನೆ” ಆರೋಪದಡಿ ಪ್ಯಾಲೆಸ್ತೀನಿಯರಿಗೆ ಮರಣದಂಡನೆ ವಿಧಿಸುವ ವಿವಾದಾತ್ಮಕ ಕಾನೂನನ್ನು ಅಂಗೀಕರಿಸಿದೆ. ಈ ಕಾನೂನು ಜನಾಂಗೀಯ ತಾರತಮ್ಯದಿಂದ ಕೂಡಿದೆ ಎಂದು ಪ್ಯಾಲೆಸ್ತೀನಿಯರು ಆಕ್ರೋಶ ವ್ಯಕ್ತಪಡಿಸಿದ್ದು, ಏಪ್ರಿಲ್ 1 ರಿಂದ ರಾಮಲ್ಲಾ, ನಾಬ್ಲಸ್ ಮತ್ತು ಹೆಬ್ರಾನ್ ಸೇರಿದಂತೆ ಆಕ್ರಮಿತ ಪಶ್ಚಿಮ ದಂಡೆ ಮತ್ತು ಪೂರ್ವ ಜೆರುಸಲೆಮ್ನಲ್ಲಿ ಬೃಹತ್ ಮುಷ್ಕರ ಹಾಗೂ ಪ್ರತಿಭಟನೆ ನಡೆಸುತ್ತಿದ್ದಾರೆ. ಸೌದಿ ಅರೇಬಿಯಾ, ಈಜಿಪ್ಟ್ ಮತ್ತು ಟರ್ಕಿ ಸೇರಿದಂತೆ ಎಂಟು ರಾಷ್ಟ್ರಗಳ ಒಕ್ಕೂಟವು ಈ ಕ್ರಮವನ್ನು ಖಂಡಿಸಿದ್ದು, ಇದು ವರ್ಣಭೇದ ನೀತಿಯನ್ನು ಮತ್ತಷ್ಟು ಭದ್ರಪಡಿಸುತ್ತದೆ ಎಂದು ಎಚ್ಚರಿಸಿದೆ. ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಆಯುಕ್ತ ವೋಲ್ಕರ್ ಟರ್ಕ್ ಅವರು, ಈ ಕಾನೂನನ್ನು ಆಕ್ರಮಿತ ಪ್ರದೇಶದ ನಿವಾಸಿಗಳ ಮೇಲೆ ಅನ್ವಯಿಸುವುದು “ಯುದ್ಧಾಪರಾಧ”ಕ್ಕೆ ಸಮಾನ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಈ ರಾಜಕೀಯ ಉದ್ವಿಗ್ನತೆಯ ನಡುವೆಯೇ ಜೆರುಸಲೆಮ್ನ ಪವಿತ್ರ ಸ್ಥಳಗಳ ಮೇಲಿನ ನಿರ್ಬಂಧಗಳು ಮುಂದುವರಿದಿವೆ. ಅಲ್-ಅಕ್ಸಾ ಮಸೀದಿಯನ್ನು ಮುಸ್ಲಿಂ ಆರಾಧಕರಿಗೆ ಮುಚ್ಚಿ ಒಂದು ತಿಂಗಳಿಗಿಂತ ಹೆಚ್ಚು ಸಮಯ ಕಳೆದಿದ್ದು, ತುರ್ತು ಪರಿಸ್ಥಿತಿಯನ್ನು ಏಪ್ರಿಲ್ ಮಧ್ಯದವರೆಗೆ ವಿಸ್ತರಿಸಲಾಗಿದೆ. ಇಸ್ರೇಲ್ನ ರಾಷ್ಟ್ರೀಯ ಭದ್ರತಾ ಸಚಿವ ಇಟಮಾರ್ ಬೆನ್-ಗ್ವಿರ್ ಅವರು ಇಸ್ರೇಲಿ ಪಡೆಗಳ ರಕ್ಷಣೆಯಲ್ಲಿ ಮಸೀದಿ ಆವರಣಕ್ಕೆ ಭೇಟಿ ನೀಡಿರುವುದು ಉದ್ವಿಗ್ನತೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ಕೇವಲ ಮುಸ್ಲಿಂ ತಾಣಗಳಲ್ಲದೆ, ಕ್ರಿಶ್ಚಿಯನ್ ಪವಿತ್ರ ತಾಣಗಳ ಮೇಲೂ ನಿರ್ಬಂಧ ಹೇರಲಾಗಿದ್ದು, ಪವಿತ್ರ ವಾರದ (Holy Week) ಸಮಯದಲ್ಲಿ ಚರ್ಚ್ ಆಫ್ ದಿ ಹೋಲಿ ಸೆಪಲ್ಚರ್ ಅನ್ನು ಸಾರ್ವಜನಿಕರಿಗೆ ಮುಚ್ಚಲಾಗಿದೆ.
ಗಾಜಾ ಪಟ್ಟಿಯಲ್ಲಿ ಶಾಂತಿ ಸ್ಥಾಪನೆಯ ಪ್ರಯತ್ನಗಳು ಸ್ಥಗಿತಗೊಂಡಿದ್ದು, ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿದೆ. ಹಮಾಸ್ ನಿಯೋಗವು ಕೈರೋದಲ್ಲಿ ಸಂಧಾನಕಾರರಿಗೆ ತಿಳಿಸಿರುವಂತೆ, ಇಸ್ರೇಲ್ ಕದನ ವಿರಾಮ ಒಪ್ಪಂದದ ಉಲ್ಲಂಘನೆಯನ್ನು ನಿಲ್ಲಿಸಿ ಗಾಜಾದಿಂದ ಸಂಪೂರ್ಣವಾಗಿ ಹೊರಹೋಗುವವರೆಗೆ ಶಸ್ತ್ರಾಸ್ತ್ರಗಳನ್ನು ತ್ಯಜಿಸುವ ಬಗ್ಗೆ ಯಾವುದೇ ಚರ್ಚೆ ನಡೆಸುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಈ ಹಿನ್ನೆಲೆಯಲ್ಲಿ ಗಾಜಾದ ಮೇಲೆ ಇಸ್ರೇಲ್ ತನ್ನ ವಾಯುದಾಳಿಯನ್ನು ತೀವ್ರಗೊಳಿಸಿದೆ. ಕಳೆದ 24 ಗಂಟೆಗಳಲ್ಲಿ ಕನಿಷ್ಠ 10 ಜನರು ಮೃತಪಟ್ಟಿದ್ದು, ಅನೇಕರು ಗಾಯಗೊಂಡಿದ್ದಾರೆ. ಅಕ್ಟೋಬರ್ 11 ರ ನಂತರ ಗಾಜಾದಲ್ಲಿ ಈವರೆಗೆ ಒಟ್ಟು 723 ಪ್ಯಾಲೆಸ್ತೀನಿಯರು ಸಾವನ್ನಪ್ಪಿದ್ದಾರೆ ಎಂದು ಅಲ್ಲಿನ ಆರೋಗ್ಯ ಸಚಿವಾಲಯದ ವರದಿಗಳು ತಿಳಿಸಿವೆ.
ಗಾಜಾದಲ್ಲಿ ಮಾನವೀಯ ಬಿಕ್ಕಟ್ಟು ತೀವ್ರ ಸ್ವರೂಪ ಪಡೆದಿದ್ದು, ಇಂಧನದ ಸಂಪೂರ್ಣ ಕೊರತೆಯಿಂದಾಗಿ ಆಸ್ಪತ್ರೆಗಳಲ್ಲಿ ನೂರಾರು ರೋಗಿಗಳ ಜೀವಕ್ಕೆ ಅಪಾಯ ಎದುರಾಗಿದೆ. ಐಸಿಯುನಲ್ಲಿರುವ ರೋಗಿಗಳು, ನವಜಾತ ಶಿಶುಗಳ ಇನ್ಕ್ಯುಬೇಟರ್ಗಳು ಮತ್ತು ಡಯಾಲಿಸಿಸ್ ಘಟಕಗಳು ಕಾರ್ಯನಿರ್ವಹಿಸಲು ಇಂಧನವಿಲ್ಲದೆ ಪರದಾಡುತ್ತಿವೆ. ಇದರೊಂದಿಗೆ ಆಹಾರದ ಕೊರತೆಯೂ ಹೆಚ್ಚಾಗಿದ್ದು, ಗಾಜಾ ನಗರದ ಬ್ರೆಡ್ ವಿತರಣಾ ಕೇಂದ್ರಗಳ ಮುಂದೆ ಜನರ ಉದ್ದನೆಯ ಸರತಿ ಸಾಲುಗಳು ಕಂಡುಬಂದಿವೆ. ಜೊತೆಗೆ, ಗಾಜಾದಾದ್ಯಂತ ಸುಮಾರು 71,000 ಟನ್ ಸಿಡಿಯದ ಸ್ಫೋಟಕಗಳು ಹೂತುಹೋಗಿದ್ದು, ಅವುಗಳಿಂದಾಗಿ ಈಗಾಗಲೇ ಐವರು ಮಕ್ಕಳು ಸೇರಿದಂತೆ ಏಳು ಜನರು ಸಾವನ್ನಪ್ಪಿದ್ದಾರೆ ಎಂದು ಮಾನವ ಹಕ್ಕುಗಳ ಕೇಂದ್ರ ಎಚ್ಚರಿಸಿದೆ.
ಪಶ್ಚಿಮ ದಂಡೆಯಲ್ಲಿ ಇಸ್ರೇಲಿ ವಸಾಹತುಗಾರರ ದಾಳಿಗಳು ಮತ್ತು ಮಿಲಿಟರಿ ಕಾರ್ಯಾಚರಣೆಗಳು ಮುಂದುವರಿದಿವೆ. ಏಪ್ರಿಲ್ 4 ರಂದು ಸುಮಾರು 40ಕ್ಕೂ ಹೆಚ್ಚು ಸಶಸ್ತ್ರ ವಸಾಹತುಗಾರರು ನಾಬ್ಲಸ್ನ ದಕ್ಷಿಣದ ಗ್ರಾಮಗಳ ಮೇಲೆ ದಾಳಿ ನಡೆಸಿ ಮನೆಗಳಿಗೆ ಹಾನಿ ಮಾಡಿದ್ದಾರೆ. ಈ ವೇಳೆ ವಸಾಹತುಗಾರರು ಗುಂಡಿನ ದಾಳಿ ನಡೆಸಿದ್ದು, ಬೆಂಕಿ ನಂದಿಸಲು ಬಂದ ಅಗ್ನಿಶಾಮಕ ಸಿಬ್ಬಂದಿಯ ಮೇಲೆಯೂ ಹಲ್ಲೆ ನಡೆಸಲಾಗಿದೆ. ಇಸ್ರೇಲಿ ಮಿಲಿಟರಿಯು ವಸಾಹತುಗಾರರನ್ನು ತಡೆಯುವ ಬದಲಿಗೆ ಅವರಿಗೆ ಬೆಂಬಲ ನೀಡುತ್ತಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ಇದೇ ವೇಳೆ, ಇಸ್ರೇಲ್ ಹೈಕೋರ್ಟ್ ಪ್ಯಾಲೆಸ್ತೀನ್ ಹೋರಾಟಗಾರ್ತಿ ರಬಿಯಾ ಅಬು ನೈಮ್ ಅವರ ಆಡಳಿತಾತ್ಮಕ ಬಂಧನವನ್ನು ಯಾವುದೇ ವಿಚಾರಣೆ ಇಲ್ಲದೆ ಮತ್ತೆ ಮೂರು ತಿಂಗಳು ವಿಸ್ತರಿಸಿದೆ.
ಇದನ್ನು ಓದಿ.
