ಇರಾನ್ನಿಂದ ಅಮೆರಿಕಕ್ಕೆ ‘ಬಿಗ್ ವಾರ್ನಿಂಗ್’: ಯುದ್ಧಭೂಮಿಯಲ್ಲಿ ಹೊಸ ದಾಳಗಳನ್ನು ಉರುಳಿಸಲು ನಾವು ಸಿದ್ಧ; ಕದನ ವಿರಾಮದ ಗಡುವು ಮುಗಿಯುವ ಮುನ್ನವೇ ಟೆಹ್ರಾನ್ ಎಚ್ಚರಿಕೆ!
ಟೆಹ್ರಾನ್/ವಾಷಿಂಗ್ಟನ್ (ಏ. 21, 2026) : ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮದ ಗಡುವು ಬುಧವಾರಕ್ಕೆ (ಏಪ್ರಿಲ್ 22) ಮುಕ್ತಾಯಗೊಳ್ಳುತ್ತಿರುವ ಬೆನ್ನಲ್ಲೇ, ಇರಾನ್ ಸರ್ಕಾರವು ಅಮೆರಿಕಕ್ಕೆ ಅತ್ಯಂತ ಗಂಭೀರ ಎಚ್ಚರಿಕೆಯನ್ನು ನೀಡಿದೆ. “ಯುದ್ಧಭೂಮಿಯಲ್ಲಿ ನಾವು ಇನ್ನೂ ಬಹಿರಂಗಪಡಿಸದ ಹೊಸ ‘ಪವರ್ ಕಾರ್ಡ್’ಗಳನ್ನು (ಅಸ್ತ್ರಗಳನ್ನು) ಪ್ರದರ್ಶಿಸಲು ಸಿದ್ಧರಿದ್ದೇವೆ” ಎಂದು ಇರಾನ್ ಹೇಳಿರುವುದು ಜಾಗತಿಕ ಮಟ್ಟದಲ್ಲಿ ಆತಂಕ ಮೂಡಿಸಿದೆ.
ಬಲಿಷ್ಠ ಅಸ್ತ್ರಗಳ ಸುಳಿವು: ಕದನ ವಿರಾಮ ವಿಸ್ತರಣೆಯ ಮಾತುಕತೆಗಳು ಹಳ್ಳ ಹಿಡಿಯುತ್ತಿರುವ ಈ ಹೊತ್ತಿನಲ್ಲಿ, ಇರಾನ್ ತನ್ನ ಮಿಲಿಟರಿ ಶಕ್ತಿಯನ್ನು ಪ್ರದರ್ಶಿಸಲು ಮುಂದಾಗಿದೆ. ಅಮೆರಿಕದ ನೌಕಾ ದಿಗ್ಬಂಧನ ಮತ್ತು ಇತ್ತೀಚಿನ ದಾಳಿಗಳಿಗೆ ಪ್ರತಿಯಾಗಿ, ಈವರೆಗೆ ಬಳಸದ ಅತ್ಯಾಧುನಿಕ ಕ್ಷಿಪಣಿಗಳು ಅಥವಾ ಡ್ರೋನ್ಗಳನ್ನು ಬಳಸುವ ಸೂಚನೆಯನ್ನು ಇರಾನ್ನ ಉನ್ನತ ಸೇನಾ ಕಮಾಂಡರ್ಗಳು ನೀಡಿದ್ದಾರೆ. “ಅಮೆರಿಕ ನಮಗೆ ಸವಾಲು ಹಾಕಿದರೆ, ನಾವು ಈ ಹಿಂದೆಂದೂ ಕಾಣದ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತೇವೆ” ಎಂದು ಟೆಹ್ರಾನ್ ಎಚ್ಚರಿಸಿದೆ.
ಮುಗಿಯುತ್ತಿರುವ ಗಡುವು – ಏನು ಬೇಕಾದರೂ ಆಗಬಹುದು!: ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ನಡೆದ ಮಾತುಕತೆಗಳು ಯಶಸ್ವಿಯಾಗದ ಕಾರಣ, ಏಪ್ರಿಲ್ 22ರ ಬುಧವಾರದ ನಂತರ ಇರಾನ್ ಮತ್ತು ಅಮೆರಿಕ ನಡುವೆ ಮತ್ತೆ ನೇರ ಸಂಘರ್ಷ ಆರಂಭವಾಗುವ ಸಾಧ್ಯತೆ ದಟ್ಟವಾಗಿದೆ. ಹೋರ್ಮುಜ್ ಜಲಸಂಧಿಯ ಬಿಕ್ಕಟ್ಟು ಮತ್ತು ತೈಲ ಪೂರೈಕೆಯ ಮೇಲೆ ಇದರ ನೇರ ಪರಿಣಾಮ ಬೀರಲಿದ್ದು, ಜಾಗತಿಕ ಮಾರುಕಟ್ಟೆ ಈಗ ಉಸಿರು ಬಿಗಿ ಹಿಡಿದು ಕುಳಿತಿದೆ.
ಅಮೆರಿಕದ ನಿಲುವು: ಇತ್ತ ಅಮೆರಿಕ ಕೂಡ ತನ್ನ ಪಟ್ಟು ಸಡಿಲಿಸಿಲ್ಲ. ಇರಾನ್ನ ಬೆದರಿಕೆಗಳಿಗೆ ಸೊಪ್ಪು ಹಾಕದ ಟ್ರಂಪ್ ಆಡಳಿತ, ದಿಗ್ಬಂಧನ ಮುಂದುವರಿಯಲಿದೆ ಎಂದು ಸ್ಪಷ್ಟಪಡಿಸಿದೆ. ಈ ಹಿನ್ನೆಲೆಯಲ್ಲಿ ಮುಂದಿನ 24 ಗಂಟೆಗಳು ಇಡೀ ವಿಶ್ವದ ಭೂಪಟದಲ್ಲಿ ಅತ್ಯಂತ ನಿರ್ಣಾಯಕ ಎನಿಸಿಕೊಂಡಿವೆ.
