ನವದೆಹಲಿ :ನೇಪಾಳ ಮತ್ತು ಟಿಬೆಟ್ ಗಡಿಭಾಗದಲ್ಲಿ ಸಂಭವಿಸಿದ ಭೀಕರ ಹಠಾತ್ ಪ್ರವಾಹ ಹಾಗೂ ಭೂಕುಸಿತದ ದುರಂತದಲ್ಲಿ ಸುಮಾರು 1,400ಕ್ಕೂ ಅಧಿಕ ಮಂದಿ ನಾಪತ್ತೆಯಾಗಿದ್ದು, ಅವರಲ್ಲಿ ಭಾರತೀಯ ಮೂಲದ ಅಮೆರಿಕನ್ ಪ್ರಜೆಗಳಾದ ದೀಪಕ್ ಅಹುಜಾ ಮತ್ತು ಅವರ ಪತ್ನಿ ಮಧು ಅಹುಜಾ ದಂಪತಿಯೂ ಸೇರಿದ್ದಾರೆ.
60ನೇ ಹುಟ್ಟುಹಬ್ಬಕ್ಕೆ ಕೈಗೊಂಡಿದ್ದ ಯಾತ್ರೆ: ದೀಪಕ್ ಅಹುಜಾ ಅವರ 60ನೇ ಹುಟ್ಟುಹಬ್ಬದ ಸಂಭ್ರಮದ ಅಂಗವಾಗಿ ಪವಿತ್ರ ಕೈಲಾಸ ಮಾನಸ ಸರೋವರ ಯಾತ್ರೆ ಕೈಗೊಳ್ಳುವುದು ಈ ದಂಪತಿಯ ಬಹುಕಾಲದ ಕನಸಾಗಿತ್ತು. ಇದಕ್ಕಾಗಿ ಅಮೆರಿಕದಿಂದ ಭಾರತಕ್ಕೆ ಆಗಮಿಸಿದ್ದ ಅವರು, ಇಶಾ ಸೇಕ್ರೆಡ್ ವಾಕ್ಸ್ ಮತ್ತು ಟ್ರೆಕ್ಕರ್ಸ್ ಸೊಸೈಟಿಯ ‘ಗ್ರೂಪ್ ಎಸ್ 3’ ಅಡಿಯಲ್ಲಿ ಟಿಬೆಟ್ನ ಸಾಗಾ ತಲುಪಿದ್ದರು. ಅಲ್ಲಿ ಸದ್ಗುರುಗಳನ್ನು ಭೇಟಿಯಾಗಿ ಯಾತ್ರೆಯನ್ನು ಯಶಸ್ವಿಯಾಗಿ ಮುಗಿಸಿ, ಮರಳಿ ಅಮೆರಿಕಕ್ಕೆ ಪ್ರಯಾಣ ಬೆಳೆಸಲು ದಕ್ಷಿಣ ಗಡಿಯತ್ತ ತೆರಳುತ್ತಿದ್ದರು.
ಕೆಲವೇ ನಿಮಿಷಗಳಲ್ಲಿ ಅಪ್ಪಳಿಸಿದ ಜಲಪ್ರಳಯ: ಸ್ಥಳೀಯ ಸಮಯ ಬೆಳಗ್ಗೆ ಸುಮಾರು 9 ಗಂಟೆಗೆ ದಂಪತಿ ಟಿಬೆಟ್-ನೇಪಾಳ ಗಡಿಯ ಗೈರಾಂಗ್ ಬಂದರಿನ ವಲಸೆ (ಇಮಿಗ್ರೇಷನ್) ಕಚೇರಿಗೆ ತಲುಪಿದ್ದರು. ಆದರೆ, ಅವರು ಅಲ್ಲಿಗೆ ತಲುಪಿದ ಕೆಲವೇ ನಿಮಿಷಗಳಲ್ಲಿ ಧಾರಾಕಾರ ಮಳೆ ಹಾಗೂ ಹಿಮನದಿ ಸರೋವರ ಸ್ಫೋಟಗೊಂಡ ಪರಿಣಾಮ ಬೃಹತ್ ಪ್ರಮಾಣದ ಪ್ರವಾಹ ಆ ಪ್ರದೇಶವನ್ನು ಆವರಿಸಿದೆ. ಕ್ಷಣಾರ್ಧದಲ್ಲಿ ರಸ್ತೆಗಳು, ವಿದ್ಯುತ್ ಸಂಪರ್ಕ ಹಾಗೂ ದೂರಸಂಪರ್ಕ ವ್ಯವಸ್ಥೆ ಸಂಪೂರ್ಣವಾಗಿ ಕಡಿತಗೊಂಡಿದೆ.
ಹೆತ್ತವರ ರಕ್ಷಣೆಗಾಗಿ ಕಣ್ಣೀರಿಟ್ಟ ಹೆಣ್ಣುಮಕ್ಕಳು: ದಂಪತಿಯ ಪುತ್ರಿಯರಾದ ಶ್ರೇಯಾ ಮತ್ತು ಆಶ್ನಾ ಅಮೆರಿಕದಲ್ಲಿದ್ದು, ಪೋಷಕರ ಸುಳಿವು ಸಿಗದೆ ಕಂಗಾಲಾಗಿದ್ದಾರೆ. “ಘಟನೆ ನಡೆಯುವ ಮುನ್ನವಷ್ಟೇ ಅಪ್ಪ-ಅಮ್ಮ ನಮ್ಮೊಂದಿಗೆ ಫೋನ್ನಲ್ಲಿ ಮಾತನಾಡಿದ್ದರು. ಬೆಳಗ್ಗೆ ಎದ್ದಾಗ ಪ್ರವಾಹದ ಸುದ್ದಿ ತಿಳಿಯಿತು. ಇಶಾ ಫೌಂಡೇಶನ್ ಇಮೇಲ್ ಮೂಲಕ ಅವರು ಪ್ರವಾಹಕ್ಕೆ ಸಿಲುಕಿರುವ ಮಾಹಿತಿ ನೀಡಿದೆ. ಅವರು ಗಡಿಯ ಚೀನಾ ಭಾಗದಲ್ಲಿ ಸಿಲುಕಿಕೊಂಡಿರಬಹುದು ಎಂಬ ಭರವಸೆಯಿದೆ” ಎಂದು ಪುತ್ರಿ ಶ್ರೇಯಾ ಕಣ್ಣೀರಿಟ್ಟಿದ್ದಾರೆ. ಸದ್ಯ ಪೋಷಕರನ್ನು ಸುರಕ್ಷಿತವಾಗಿ ಪತ್ತೆಹಚ್ಚಲು ಪುತ್ರಿಯರು ಅಂತಾರಾಷ್ಟ್ರೀಯ ರಾಯಭಾರ ಕಚೇರಿಗಳು ಹಾಗೂ ರಕ್ಷಣಾ ತಂಡಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದಾರೆ.
ಇದನ್ನು ಓದಿ : Delhi : ದೆಹಲಿಯಲ್ಲಿ ಯುವ ಮಾಡೆಲ್ ಭೀಕರ ಕೊಲೆ ; ಎನ್ಕೌಂಟರ್ನಲ್ಲಿ ಜಿಮ್ ಟ್ರೈನರ್ ಇಮ್ರಾನ್ನ ಎರಡೂ ಕಾಲಿಗೆ ಬಿತ್ತು ಗುಂಡು!
