ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಐಟಿ ಕೆಲಸ ಸಿಗುವುದು ಸುಲಭ, ಆದರೆ ಒಂದು ಒಳ್ಳೆಯ ಬಾಡಿಗೆ ಮನೆ ಹುಡುಕುವುದು ಅಷ್ಟು ಸುಲಭವಲ್ಲ ಎಂಬ ಮಾತಿದೆ. ಇದಕ್ಕೆ ಪುಷ್ಟಿ ನೀಡುವಂತೆ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಸುದ್ದಿಯೊಂದು ಬೆಂಗಳೂರಿನ ಬಾಡಿಗೆ ಮಾರುಕಟ್ಟೆಯ ಭೀಕರ ಪೈಪೋಟಿಯನ್ನು ಅನಾವರಣಗೊಳಿಸಿದೆ. ಕೇವಲ ಒಂದು ಗಂಟೆಯ ವಿಳಂಬದಿಂದಾಗಿ ಯುವತಿಯೊಬ್ಬಳು ತನಗೆ ಇಷ್ಟವಾಗಿದ್ದ ಮನೆಯನ್ನು ಕಳೆದುಕೊಂಡ ಪ್ರಸಂಗ ನಡೆದಿದೆ.
ನಡೆದಿದ್ದೇನು?: ಬೆಂಗಳೂರಿನಲ್ಲಿ ವಾಸವಿರುವ ಯುವತಿಯೊಬ್ಬಳು ತನಗಾಗಿ 1BHK ಮನೆಯೊಂದನ್ನು ಹುಡುಕುತ್ತಿದ್ದಳು. ಬಹಳ ಹುಡುಕಾಟದ ನಂತರ ಒಂದು ಮನೆ ಇಷ್ಟವಾಗಿತ್ತು. ಮನೆಯ ಮಾಲೀಕರೊಂದಿಗೆ ಮಾತುಕತೆ ನಡೆಸಿ, ಒಂದು ಗಂಟೆಯೊಳಗೆ ಮುಂಗಡ ಹಣ (Advance) ಪಾವತಿಸುವುದಾಗಿ ಹೇಳಿದ್ದಳು. ಆದರೆ, ಆ ಒಂದು ಗಂಟೆ ಕಳೆಯುವಷ್ಟರಲ್ಲಿ ಆ ಮನೆ ಬೇರೆಯವರ ಪಾಲಾಗಿದೆ. ಮನೆ ಮಾಲೀಕರು ಆ ಒಂದು ಗಂಟೆಯ ಅವಧಿಯಲ್ಲೇ ಮತ್ತೊಬ್ಬ ಬಾಡಿಗೆದಾರರಿಂದ ಹಣ ಪಡೆದು ಮನೆ ಫೈನಲ್ ಮಾಡಿದ್ದರು.
ಯುವತಿಯು ಈ ಕಹಿ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ಬೆನ್ನಲ್ಲೇ ನೆಟ್ಟಿಗರು ಬೆಂಗಳೂರಿನ ಬಾಡಿಗೆ ಮನೆಯ ಪರಿಸ್ಥಿತಿಯ ಬಗ್ಗೆ ಚರ್ಚೆ ಆರಂಭಿಸಿದ್ದಾರೆ. “ಬೆಂಗಳೂರಿನಲ್ಲಿ ಮನೆ ಬಾಡಿಗೆ ಪಡೆಯುವುದು ಐಐಟಿ ಎಂಟ್ರೆನ್ಸ್ ಎಕ್ಸಾಮ್ಗಿಂತಲೂ ಕಷ್ಟವಾಗಿದೆ” ಎಂದು ಹಲವರು ಕಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು ಬೆಂಗಳೂರಿನ ಇಂದಿರಾನಗರ, ಕೋರಮಂಗಲದಂತಹ ಏರಿಯಾಗಳಲ್ಲಿ ಮನೆಯನ್ನು ನೋಡಿದ ತಕ್ಷಣವೇ ಅಡ್ವಾನ್ಸ್ ನೀಡದಿದ್ದರೆ ಮನೆ ಸಿಗುವುದು ಅಸಾಧ್ಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಈ ಘಟನೆಯು ಬೆಂಗಳೂರಿನಂತಹ ಮಹಾನಗರಗಳಲ್ಲಿ ಹೆಚ್ಚುತ್ತಿರುವ ಜನಸಂಖ್ಯೆ ಮತ್ತು ಅದಕ್ಕೆ ತಕ್ಕಂತೆ ಇಲ್ಲದ ವಸತಿ ಸೌಕರ್ಯಗಳ ನಡುವಿನ ಅಂತರವನ್ನು ಎತ್ತಿ ತೋರಿಸಿದೆ. ಮನೆಯ ಮಾಲೀಕರು ಕೂಡ ಅತಿ ಹೆಚ್ಚು ಹಣ ನೀಡುವ ಅಥವಾ ತಕ್ಷಣ ಹಣ ಪಾವತಿಸುವವರಿಗೆ ಆದ್ಯತೆ ನೀಡುತ್ತಿರುವುದು ಬಾಡಿಗೆದಾರರಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.
ಇದನ್ನು ಓದಿ : Mangaluru : ಬೈಕ್ ಡಿಕ್ಕಿಯಾಗಿ ಗಾಯಗೊಂಡ ಸವಾರ ಸಾವು
