ಅಮೆರಿಕ ಮತ್ತು ಇಸ್ರೇಲ್ ಜಂಟಿ ಸೇನಾ ದಾಳಿಯಲ್ಲಿ ಇರಾನ್ನ ಉನ್ನತ ನಾಯಕರ ಸರಣಿ ಹತ್ಯೆ ಸಂಭವಿಸಿದ್ದು ಇರಾನ್ ಸರ್ಕಾರದ ಅಧಿಕೃತ ಸುದ್ದಿ ಸಂಸ್ಥೆ IRNA ದೃಢಪಡಿಸಿದೆ. ರಕ್ಷಣಾ ಸಚಿವ ಅಝೀಝ್ ನಾಸಿರ್ಝಾದೆ, ಸೇನಾ ಮುಖ್ಯಸ್ಥ ಅಬ್ದುಲ್ ರಹೀಮ್ ಮೌಸವಿ ಮೃತಪಟ್ಟಿದ್ದಾರೆ ಎಂದು ಖಚಿತಪಡಿಸಲಾಗಿದ್ದು, ಇರಾನ್ ಸರ್ವೋಚ್ಚ ನಾಯಕ ಆಯತುಲ್ಲ ಅಲಿ ಖಾಮಿನೈ ಅವರು ಸಹ ದಾಳಿಯಲ್ಲಿ ಹತರಾದರೆಂದು ಇರಾನ್ ಸರ್ಕಾರ ದೃಢಪಡಿಸಿದೆ.
ಇದರ ಜೊತೆಗೆ ಖಾಮಿನೈ ಅವರ ಭದ್ರತಾ ಸಲಹೆಗಾರ ಅಲಿ ಶಮ್ಖಾನಿ ಮತ್ತು ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ನ (IRGC) ಕಮಾಂಡರ್-ಇನ್-ಚೀಫ್ ಮೊಹಮ್ಮದ್ ಪಕ್ಪೌರ್ ದಾಳಿಯಲ್ಲಿ ಮೃತಪಟ್ಟಿದ್ದಾರೆ ಎಂದು IRNA ವರದಿ ತಿಳಿಸಿದೆ. ಇರಾನ್ ಸಶಸ್ತ್ರ ಪಡೆಗಳ ಮತ್ತಷ್ಟು ಉನ್ನತ ಕಮಾಂಡರ್ಗಳ ಹೆಸರುಗಳನ್ನು ಹಂತ ಹಂತವಾಗಿ ಪ್ರಕಟಿಸಲಾಗುವುದು ಎಂದು ಹೇಳಿದೆ.
ಒಂದೇ ದಾಳಿಯಲ್ಲಿ ಯಾವುದೇ ದೇಶದ ಸರ್ವೋಚ್ಚ ನಾಯಕ, ರಕ್ಷಣಾ ಸಚಿವ, ಸೇನಾ ಮುಖ್ಯಸ್ಥ ಮತ್ತು ಪ್ರಮುಖ ಮಿಲಿಟರಿ ಕಮಾಂಡರ್ಗಳು ಏಕಕಾಲಕ್ಕೆ ಹತರಾದ ಘಟನೆ ಸಮಕಾಲೀನ ಇತಿಹಾಸದಲ್ಲಿ ಅಪೂರ್ವ ಎಂದು ವಿಶ್ಲೇಷಕರು ಹೇಳಿದ್ದಾರೆ. ಈ ಬೆಳವಣಿಗೆ ಮಧ್ಯಪ್ರಾಚ್ಯ ರಾಜಕೀಯದಲ್ಲಿ ಅಭೂತಪೂರ್ವ ಆಘಾತ ಮೂಡಿಸಿದ್ದು ಜಾಗತಿಕ ಭೌ-ರಾಜಕೀಯ ಪರಿಸ್ಥಿತಿ ಅನಿಶ್ಚಯ ತಿರುಗಿ ಬಂದಿದೆ.
ದಾಳಿಯ ನಂತರ ಇರಾನ್ ಸರ್ಕಾರ ರಾಷ್ಟ್ರವ್ಯಾಪಿ ಭದ್ರತಾ ಎಚ್ಚರಿಕೆ ಜಾರಿಗೊಳಿಸಿದ್ದು ಉನ್ನತ ಮಟ್ಟದ ತುರ್ತು ಸಭೆಗಳು ನಡೆಯುತ್ತಿವೆ. ಇರಾನ್ ನ ಮಧ್ಯಂತರ ನಾಯಕತ್ವ ರಚಿಸಲಾಗುತ್ತಿದ್ದು ಅಧಿಕೃತ ಪ್ರತ್ಯಾಕ್ರಮಣ ಘೋಷಣೆ ನಿರೀಕ್ಷಿಸಲಾಗುತ್ತಿದೆ. ಈ ಬೆಳವಣಿಗೆ ಭಾರತ ಸೇರಿ ಇಡೀ ಜಗತ್ತನ್ನು ಅಲ್ಲಾಡಿಸಿದ್ದು ತೈಲ ಮಾರುಕಟ್ಟೆ ತೀವ್ರ ಅಸ್ಥಿರತೆ ಅನುಭವಿಸಿದೆ.
